ԵՐԵՎԱՆ, 18 սեպտեմբերի – Sputnik․ Քաղաքագետ Սուրեն Սուրենյանցը ՀՀ վարչապետ Նիկոլ Փաշինյանին համեմատել է Վրաստանի հանգուցյալ նախագահ Էդուարդ Շևարդնաձեի հետ, ով պարբերաբար հաղորդում էր իր դեմ մահափորձերի մասին:
Sputnik Արմենիայի մուլտիմեդիոն կենտրոնում կայացած մամուլի ասուլիսի ժամանակ փորձագետը մեկնաբանեց Հայաստանի քննչական կոմիտեի հաղորդագրությունը, թե իբր իշխանությունը զավթել ծրագրած և Ռուսաստանում նախապատրաստված խումբ է բացահայտվել։
Փորձագետը նշեց, որ գործի մանրամասներին ծանոթ չէ, սակայն հիշեցրեց՝ նման հայտարարություններ նախկինում էլ են արվել: Օրինակ՝ գրեթե մեկ տարի առաջ հայտարարվեց Երևանի նախկին քաղաքապետ Ալբերտ Բազեյանի հետ կապված խմբի բացահայտման մասին։ Այն ժամանակ գործը կառուցվում էր մեկ մարդու ցուցմունքների վրա, որը հետագայում հրաժարվեց իր խոսքերից։
Սուրենյանցը նշեց՝ ՀՀ վարչապետ Նիկոլ Փաշինյանը պարբերաբար մատնանշում է «ռուսական հետքը» երկրի ներքին գործերում, ինչը հակասական է թվում Ռուսաստանի հետ հարգալից և կառուցողական երկխոսություն պահպանելու անհրաժեշտության մասին նրա նախկին հայտարարությունների ֆոնին:
Քաղաքագետի կարծիքով՝ նման բազմաբնույթ խոսքերը տպավորություն են ստեղծում, որ Փաշինյանը չի հիշում, թե ինչ էր ասում մեկ շաբաթ կամ 10 օր առաջ: Արդյունքում ստացվում է հակասական և իրարամերժ հայտարարությունների ամբողջություն։