ԵՐԵՎԱՆ, 17 սեպտեմբերի – Sputnik. Մայր աթոռ Սուրբ Էջմիածնի զանգակատան տարածքում կաթողիկոսների հուղարկավորության տեղ այլևս չկա։ Այս մասին լրագրողների հետ զրույցում ասաց Մայր աթոռի հրատարակությունների ու միջոցառումների կազմակերպման հանձնախմբի ատենապետ Նաթան սրբազանը։
«Մայր տաճարի հրապարակը Սուրբ Պետրոսի հրապարակը չէ իր չափերով, և այնտեղ այլևս տեղ չկա։ Դրա համար Վեհափառ հայրապետին առաջարկվեց դրսում հուղարկավորություն չանել այլևս, որպեսզի բակը գերեզմանատան չվերածվի»,– ասաց նա։
Իսկ կաթողիկոսների հուղարկավորության համար արդեն կառուցվում է կաթողիկոսական դամբարան, որը նաև ծառայելու է իբր մատուռ և մոմավառության սրահ, քանի որ վերաօծումից հետո Մայր տաճարում այլևս մոմավառություն թույլ չեն տալու։
Հիշեցնենք` Մայր տաճարը կվերաօծվի սեպտեմբերի 29-ին` ժամը 10։30-ին։