ԵՐԵՎԱՆ, 16 սեպտեմբերի - Sputnik. Թենիսիստուհի Էլինա Ավանեսյանի ընտանիքը Լեռնային Ղարաբաղից է, և ընտանիքում առավելապես հայերեն են խոսում: Այս մասին Ավանեսյանն ասաց մամուլի ասուլիսի ժամանակ՝ պատասխանելով Sputnik Արմենիայի թղթակցի հարցին։
«Ինձ դիմում են հայերեն, և ես պատասխանում եմ ռուսերեն, իսկ երբեմն՝ հայերեն»,-պատմեց թենիսիստուհին:
Ավանեսյանը նշեց, որ հայերեն հասկանում է, բայց դեռ այնքան էլ վստահ չի խոսում: Խոստացավ հաջորդ ասուլիսի ժամանակ մայրենի լեզվով խոսել։
Էլինա Ավանեսյանը վստահեցրեց, որ տեղափոխության հիմնական նպատակը թենիսի մասսայականացումն է Հայաստանում: Նա լիահույս է, որ կկարողանա մոտիվացնել երիտասարդ սերնդին:
«Ցանկանում եմ առավել շատ հայկական դրոշներ տեսնել միջազգային կորտերում»,-ասաց նա։ Իր նպատակների մասին խոսելիս թենիսիստուհին ասաց, որ առաջիկա մեկ տարվա ընթացքում պատրաստվում է բարելավել վարկանիշային աղյուսակում իր դիրքը և, ինչու ոչ, տեղ զբաղեցնել լավագույն տասնյակում:
Հատկանշական է, որ ասուլիսի կազմակերպիչների որոշմամբ այն անցկացվում էր անգլերեն։ Իսկ մարզուհին նաև Արցախի բարբառի իր իմացությունը ցուցադրեց՝ բարբառով շնորհակալություն հայտնելով հավաքվածներին:
Մամուլի ասուլիսից հետո Էլինա Ավանեսյանը հանդիպում ունեցավ արցախահայ փոքրիկների հետ, այնուհետև վարպետության դաս անցկացրեց երիտասարդ թենիսիստների հետ:
Նշենք, որ թենիսիստուհի Էլինա Ավանեսյանն օգոստոսին ՀՀ քաղաքացու անձնագիր է ստացել և հանդես է գալիս Հայաստանի դրոշի ներքո: Նա 21 տարեկան է, ծնվել է Պյատիգորսկում: Ավանեսյանը համաշխարհային վարկանիշում 49-րդ տեղն է զբաղեցնում։ Հուլիսին նա հասել է WTA-ի հովանու ներքո անցկացվող մրցաշարի՝ իր կարիերայի առաջին եզրափակչին։ Մրցաշարն անցկացվում էր Ռումինիայի Յասսի քաղաքում: Եզրափակիչում նա պարտվել է ռուսաստանցի Միրա Անդրեևային։