ԵՐԵՎԱՆ, 13 սեպտեմբերի – Sputnik. Հայաստանում մի քանի տարի հետո Կովկասյան ազնվացեղ եղջերուներին հնարավոր կլինի ազատ բնության մեջ՝ բնական պայմաններում հանդիպել։ Տասնամյակներ շարունակ դա անիրական մի բան էր թվում։ Գրեթե 70 տարի նրանք Հայաստանից իսպառ վերացել էին` 1954թ․-ից ի վեր եղջերուներին ոչ ոք չէր տեսել։ 2018թ․–ին «Դիլիջան» ազգային պարկում բացվեց եղջերուների բազմացման կենտրոն։ 2022-ին կենտրոնից ազատ բնություն բաց թողնվեց 3 եղջերու։
Հիմա արդեն կենտրոնում ավելի քան 40 եղջերուներ են ապրում, որոնցից 10-ն այսօր ազատ բնություն բաց թողնվեցին։
Շրջակա միջավայրի նախարարի տեղակալ Արա Մկրտչյանի խոսքով՝ մենք բնության մեջ ոչ միայն այս եղջերուներին այլևս չենք հանդիպում, այլև շատ կենդանատեսակների։ Կենսաբազմազանության հավասարակշռությունը ոչ միայն խախտվել է, այլև շատ կենդանատեսակներ անհետացման եզրին են հայտնվել։
«Նմանատիպ ծրագրերով փորձ է արվում մեր երկրում նաև մշակույթ ձևավորել, որ գնանք կենսաբազմազանության վերականգնման ուղղությամբ, որը, հավատացե՛ք, ապահովելու է բոլորիս կյանքի որակը, անմիջական անդրադարձ է ունենալու բոլորիս վրա»,- նշում է նախարար տեղակալը։
Վստահ է՝ եղջերուները ոչ միայն հարմարվելու են բնական պայմաններին, այլև սերունդ են տալու։ Նպատակ ունեն ամեն տարի 10-15 առանձնյակ բաց թողնել ազատ բնություն։ Շուտով նաև նախատեսում են արու եղջերու բերել հարևան Վրաստանից, որ գենետիկորեն ճիշտ սերունդ ունենալու հարցն էլ լուծվի։ Ի դեպ, եղջերուներն ազատ են արձակվում հատուկ ռադիո վզկապներով, որոնց միջոցով հնարավոր է մոնիտորինգ իրականացնել, վերահսկել եղջերուների տեղաշարժն ու պաշտպանել նրանց որսագողներից։
Իսկ որսագողության մասով առաջին անգամ Հայաստանում ստեղծվել է հատուկ էկոպարեկային ծառայություն, հիմա համապատասխան ստորաբաժանումներն են ձևավորվում, որոնք 24/7 ռեժիմով հանրապետության տարածքում պայքար են մղելու ոչ միայն որսագողության, այլև բնության դեմ ուղղված տարբեր հանցանքների ու զանցանքների դեմ։