Միշտ փորձել ենք օգնել Հայաստանին. Լուկաշենկոն՝ Երևանի հետ հարաբերությունների մասին

ԵՐԵՎԱՆ, 12 սեպտեմբերի – Sputnik. Բելառուսը հանդես է գալիս Հայաստանի հետ լավ հարաբերությունների պահպանման օգտին։ Այս մասին երկրի նախագահ Ալեքսանդր Լուկաշենկոն հայտարարել է Բելառուսում բնակվող ազգային համայնքների ներկայացուցիչների հետ հանդիպման ժամանակ: Լուկաշենկոն խոստովանել է՝ երկկողմ հարաբերություններում որոշակի «թերությունների և նրբություններ» կան, բայց վստահ է՝ Մինսկի մեղքն այդտեղ բացարձակ չկա:

Բելառուսի նախագահը վստահ է, որ ԱՄՆ ընտրություններից հետո նոր ղեկավարությունը, անկախ այն հանգամանքից՝ դա կլինի Թրամփը, թե Հարիսը, կվերանայի իր քաղաքականությունը:

Նրա խոսքով՝ ինքը մշտապես Հայաստանի ղեկավարությանը խորհուրդ է տվել վստահել քաղաքականության մեջ իր բազմամյա փորձին։

Լուկաշենկոն հավելել է, որ իր կյանքում շատ բան է տեսել, նրանց (Արևմուտքին,–խմբ.) հավատալ չի կարելի: Նա միաժամանակ վստահ է, որ հայերը շատ իմաստուն են, և մոտ ժամանակներս նրանք կհասկանան, թե որտեղ է իրենց երջանկությունը։

Հիշեցնենք, որ Լուկաշենկոն մայիսի 15-17-ը Ադրբեջանում էր և այդ ընթացքում այցելել էր նաև Լեռնային Ղարաբաղ։ Լուկաշենկոն հայտարարել էր, որ 2020 թվականի պատերազմից առաջ (դիմելով Իլհամ Ալիևին՝ նա ասել էր «ձեր ազատագրական պատերազմից» առաջ) ինքն ու Ալիևը զրուցել են և եկել այն եզրակացության, որ պատերազմում հաղթել հնարավոր է։ Նա հավելել էր` հիմա եկել է այն ծանր ժամանակը, երբ պետք է վերակենդանացնել այդ տարածքները։

Հունիսի 13–ին խորհրդարանում ելույթ ունենալիս Փաշինյանը հայտարարեց, որ ո՛չ ինքը, ո՛չ էլ երկրի որևէ պաշտոնյան չի այցելի Բելառուս, քանի դեռ այդ երկրի նախագահը Ալեքսանդր Լուկաշենկոն է։ Դա պայմանավորված է Բելառուսի նախագահի երեք շաբաթ առաջ արված հայտարարություններով՝ կապված Լեռնային Ղարաբաղում պատերազմի հետ։ Փաշինյանի հայտարարությունից շատ չանցած` հայտնի դարձավ, որ Բելառուսում ՀՀ դեսպանը կանչվել է Երևան՝ խորհրդակցությունների։