ԵՐԵՎԱՆ, 11 սեպտեմբերի – Sputnik. ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Հայաստանի վարչապետ Նիկոլ Փաշինյանի հայտարարությունը, որում նա հղում էր արել Լեռնային Ղարաբաղի վերաբերյալ եռակողմ հայտարարությանը։
ՀՀ վարչապետը մեջբերել էր եռակողմ հայտարարության մի հատված, բայց ոչ ամբողջությամբ. «Հայաստանի Հանրապետությունը երաշխավորում է Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև տրանսպորտային հաղորդակցության անվտանգությունը՝ քաղաքացիների, տրանսպորտային միջոցների և բեռների երկու ուղղություններով անխոչընդոտ տեղաշարժը կազմակերպելու նպատակով» (9-րդ կետի վերջում ասվում է, որ «տրանսպորտային հաղորդակցության վերահսկողությունն իրականացնում են Ռուսաստանի ԱԴԾ սահմանապահ ծառայության մարմինները». խմբ.):
Զախարովան նշել է, որ 2020 թվականի նոյեմբերի 9-ի եռակողմ հայտարարությունը չեղյալ հայտարարելու Երևանի ցանկության մասին չի լսել ո՛չ դիվանագիտական խողովակներով, ո՛չ էլ հրապարակավ, մինչդեռ ինչպես գոյություն ունեցող փաստաթղթերը, այնպես էլ դրանց առանձին կետերը շահարկելու բազմաթիվ փորձեր են եղել։
«Կարծում եմ` չի կարելի անպատասխանատու կեպով վերաբերվել փաստաթղթերի մեջբերմանը»,– ասել է նա։
Զախարովայի խոսքով` չի կարելի չտեսնել ստորագրված փաստաթղթերի էությունը և գործել կոնյուկտուրային նկատառումներով` մոռանալով այն բարձր գինը, որ վճարել են նախորդ սերունդները։
Դիվանագետը կոչ է արել հարգանքով վերաբերել այն անձանց ջանքերին, որոնք համապատասխան փաստաթղթերի դրույթները մշակել են հանուն տարածաշրջանի խաղաղության և կայունության։
«Պատասխանատու քաղաքական գործիչները չպետք է անպատասխանատու վերաբերվեն այն փաստաթղթերին, որոնք մշակվել են պատմական բարդ գործընթացի արդյունքում»,– հայտարարել է Զախարովան։
Նշենք, որ ՌԴ արտգործնախարար Լավրովն ավելի վաղ հայտարարել էր, որ, ցավոք, Սյունիքի տարածքով հաղորդակցվելու հարցում հենց հայկական ղեկավարությունն է սաբոտաժի ենթարկում այն պայմանավորվածությունը, որի տակ դրված է վարչապետ Նիկոլ Փաշինյանի ստորագրությունը:
Ավելի ուշ ՌԴ ԱԳՆ-ում հիշեցրին, որ Հարավային Կովկասում տնտեսական և տրանսպորտային կապերի ապաշրջափակման ուղղությամբ մեծ աշխատանք է կատարվել ՌԴ–ի, Հայաստանի և Ադրբեջանի փոխվարչապետների համանախագահությամբ եռակողմ աշխատանքային խմբի շրջանակում: Գերատեսչությունից նշեցին, որ Երևանը հեռացել է նախկինում համաձայնեցված դիրքերից, սկսել է պնդել ՌԴ սահմանապահների ներկայության հարցում փոխադարձության սկզբունքը` պահանջելով, որ նրանք գտնվեն ոչ միայն հայկական, այլև ադրբեջանական կողմում։ Հակառակ եռակողմ հայտարարության 9-րդ կետի` Հայաստանի ներկայացուցիչները հրաժարվել են համաձայնեցնել ՌԴ ԱԴԾ սահմանապահ ծառայության ուժերի կողմից տրանսպորտային հաղորդակցության վերահսկողությունը։