ԵՐԵՎԱՆ, 10 սեպտեմբերի – Sputnik. Ադրբեջանը երրորդ երկրի ներգրավվածության արդյունքում կարող է Հայաստանի նկատմամբ այլ հռետորաբանություն դրսևորել ` սպասարկելով այլ երկրների շահերը։ Ազգային ժողովում լրագրողների հետ զրույցում այս հայտարարությունն արեց «Քաղաքացիական պայմանագիր» խմբակցության քարտուղար Արթուր Հովհաննիսյանը։
«Հայաստան–Ադրբեջան երկխոսությունն ունի ստացված դրվագներ, բայց փորձը ցույց է տալիս, որ երբ այդ խոսակցությունը խառնվում են տարածաշրջանային այլ երկրներ , որոնք այլ շահեր ունեն այս տարածաշրջանում, նրանց կողմից ճնշումները ևս կարող են անդրադառնալ ՀՀ–Ադրբեջան խոսակցության վրա»,– ասաց նա։
Պատգամավորը չժխտեց, որ Ադրբեջանի հետ բանակցային գործընթացը հարթ չի ընթանում, բայց հավելեց, որ խաղաղության պայմանագրի բովանդակության մեծ մասն արդեն համաձայնեցված է:
Հիշեցնենք` հունիսի 26-ին հայտնի դարձավ, որ Հայաստանը Ադրբեջանից ստացել է խաղաղության պայմանագրի նախագծի վերաբերյալ առաջարկությունների 10-րդ փաթեթը և պատրաստել առաջարկների պատասխան փաթեթը։ Միաժամանակ Երևանը հաստատեց նաև ադրբեջանական կողմի հայտարարությունը, որ խաղաղության պայմանագրի նախագծից փոխադարձ համաձայնությամբ հանվել է տարածաշրջանային հաղորդակցություններին վերաբերող հոդվածը։
ՀՀ արտգործնախարար Արարատ Միրզոյանը սեպտեմբերի 9-ին հայտարարեց, որ Երևանն ու Բաքուն լիովին համաձայնեցրել են խաղաղության պայմանագրի 16 հոդվածներից 13-ը։
Նշենք, որ Ադրբեջանի նախագահ Իլհամ Ալիևը հայտարարել է` մինչև այս տարվա նոյեմբեր Հայաստանի հետ խաղաղության համաձայնագրի ստորագրումը միանգամայն իրատեսական է։ Նա միաժամանակ նշել է, որ այդ փաստաթղթի կնքումն անհնար է առանց ՀՀ Սահմանադրության փոփոխության։