Հայ առաքելական և ռուս ուղղափառ եկեղեցիները պետք է բարեկամական հարաբերություններ պահպանեն, որպեսզի երկրների միջև դրական հարաբերություններ ամրապնդվեն։ Դա պետք է արվի այդ թվում Ուկրաինայում հակամարտության արագ կարգավորման համար։ Այս մասին «Իզվեստիա»–ին ասել է Հայ առաքելական սուրբ եկեղեցու Շիրակի թեմի առաջնորդ Միքայել Աջապահյան։
«Հայկական և ռուսական եկեղեցիները պետք է առաջնագծում լինեն` երկու եկեղեցու, երկու ժողովրդի և երկու երկրի միջև եղբայրական ու բարեկամական հարաբերությունները պահպանելու համար»,– ասել է նա։
Արքեպիսկոպոսը նշել է, որ իրեն շատ են մտահոգել Ուկրաինայի ուղղափառ եկեղեցու շուրջ կատարվող իրադարձությունները։ Աջապահյանը հույս է հայտնել, որ Ուկրաինայում հակամարտությունը շուտով կավարտվի, թյուրըմբռնումները կվերափոխվեն այլ ուղղությամբ և խթան կհանդիսանան ՀՀ–ՌԴ փոխհարաբերությունների զարգացման համար։
«Տարաձայնություններ միշտ լինում են, ու հենց եկեղեցում էլ են դրանք լինում, բայց այդ ամենը խաղաղ ու աննկատ հանգուցալուծվում է։ Եկեղեցին տալիս է այդ օրինակը, թե ինչպես է պետք լուծել խնդիրները»,– ընդգծել է Շիրակի թեմի առաջնորդը։
Սեպտեմբերի 2-ին Ռուսաստանի նախագահ Վլադիմիր Պուտինը «Օնոդոր» թերթին տված հարցազրույցում հայտարարել էր, որ կանոնական ուղղափառությունն Ուկրաինայում նախկինում հետապնդումների էր ենթարկվում, իսկ այժմ՝ ուղղակի արգելքի։ Նա ընդգծել էր, որ Կիևի բոլոր այդ քայլերն իրականացվում են Արևմուտքի երկրների աջակցությամբ։