ԵՐԵՎԱՆ, 8 սեպտեմբերի – Sputnik. Արմավիրի մարզի Նալբանդյան համայնքում ծառայողական պարտականությունները կատարելիս վիրավորում ստացած ոստիկանը վիրահատվել է։ Տեղեկությունը Sputnik Արմենիային հայտնեց ՀՀ ՆԳ նախարարի մամուլի խոսնակ Նարեկ Սարգսյանը։
Ավելի վաղ տեղեկացրել էինք, որ սեպտեմբերի 7-ին Նալբանդյան համայնքում օպերատիվ տեղեկությունը ստուգելու ժամանակ գյուղի բնակիչը կրակոցներ է արձակել ոստիկանների ուղղությամբ։ Նրանցից մեկը` ոստիկանության կապիտան Հայրապետ Ստեփանյանը մահացել է, մյուսը` վիրավորվել։
«Ծառայողը վիրահատվել է, գտնվում է բժիշկների հսկողության տակ, կյանքին վտանգ չի սպառնում»,– նշեց Սարգսյանը։
Նա ընդգծեց, որ ոստիկանի վիճակը կայուն է, բայց դեռ պետք է ապաքինման շրջան անցնի:
Նշենք, որ վիրավորում ստացած ծառայողը համայնքային ոստիկանության տեսուչ, ոստիկանության լեյտենանտ Արթուր Այվազյանն է։
Հիշեցնենք, որ սպանության և սպանության փորձ կատարելու մեջ կասկածվող անձը Նալբանդյան համայնքի 41-ամյա բնակիչ Մանուկ Մարգարյանն է։
Ըստ նախնական տեղեկությունների՝ 41-ամյա տղամարդը մեքենայի միջից կրակոցներ է արձակել ոստիկանների ուղղությամբ, այնուհետև իջել և շարունակել է կրակել, հետո դիմել է փախուստի։ Իրավապահները հայտնաբերել և ձերբակալել են նրան։
Քրեական վարույթ է նախաձեռնվել սպանության, սպանության փորձի և հրազենի, ռազմամթերքի ապօրինի շրջանառության հատկանիշներով։