Ի՞նչ է կարդում քաղաքապետը. Երևանի գրքի փառատոնն այս տարի գրեթե 50 մասնակից ունի

ԵՐԵՎԱՆ, 6 սեպտեմբերի – Sputnik. Երևանում այսօր մեկնարկած Գրքի փառատոնին մասնակցում են շուրջ 50 տպարաններ, գրախանութներ և մշակութային հաստատություններ։

Փառատոնի կազմակերպիչ Անի Ղազարյանի խոսքով` եռօրյա միջոցառումներին մասնակցում է մոտ հարյուր գրող և գրաքննադատ, ընդ որում ոչ միայն Հայաստանից, այլև Ռուսաստանից, Իտալիայից, Իսպանիայից, Սլովենիայից, Վրաստանից և այլ երկրներից։ Փառատոնի շրջանակում նախատեսվում է անցկացնել գրական բանավեճեր, վարպետության դասեր, բացառիկ հանդիպումներ արտասահմանյան գրողների հետ և նույնիսկ սթենդափ։

«Համոզված եմ, որ ճիշտ գիրքը մենք հանդիպում ենք մեր կյանքի այն պահին, երբ այն հատկապես շատ է մեզ անհրաժեշտ։ Հույս ունեմ, որ փառատոնի բոլոր այցելուները կգտնեն իրենց գիրքը», – նշեց Ղազարյանը։

Երևանի քաղաքապետ Տիգրան Ավինյանը նշեց, որ քաղաքային իշխանություններն արդեն երկրորդ տարին է՝ ֆինանսավորում են փառատոնը, քանի որ համոզված են, որ ընթերցող մարդը տարբերվում է իր որակներով։ Նրա խոսքով` այդ մարդիկ հանրային շահերը սեփական շահերից վեր են դասում և կարող են զոհաբերել անձնական շահը հանուն ընդհանուր նպատակների:

«Համոզված ենք, որ ընթերցանությունը փոխում է մարդուն, նրա մտածելակերպը, նրան դարձնում է ավելի հոգատար և հասկացող», – ասաց քաղաքապետը։

Sputnik Արմենիայի թղթակցին այն հարցին, թե որ գրքերն են փոխել իրեն, Ավինյանն ասաց, որ այդպիսի գրքերը շատ են, հիմնականում դրանք փիլիսոփայական ստեղծագործություններ են։

Sputnik Արմենիան ոչ մեծ հարցում է անցկացրել փառատոնի մասնակիցների շրջանում։ Այցելուների մեծ մասը կանայք են։ Նրանք հիմնականում հետաքրքրվում են փիլիսոփայական ժանրի կամ մոտիվացնող արտասահմանյան գրականությամբ, բայց բեսթսելլերը դեռ դժվար է որոշել, քանի որ ցուցահանդեսը ընդամենը մի քանի ժամ առաջ է բացվել։ Միայն տպարաններից մեկն ակնհայտ առաջատար ուներ վաճառքների թվով` դա Ռոբերտ Շարմի «Վանականը, որը վաճառեց իր Ferrari»–ին գիրքն է։

Երևանի գրքի փառատոնն անցկացվում է 2017 թվականից։ Դրա պարտադիր մաս է կազմում գրքի տոնավաճառը, ինչպես նաև գրական մրցույթն ու մրցանակների շնորհումը «Արձակ», «Պոեզիա», «Դրամատուրգիա», «Մանկական գրականություն» անվանակարգերում։