ԵՐԵՎԱՆ, 3 սեպտեմբերի – Sputnik. Մարդիկ արդեն կարող են Գորիսում ժամը 6–ից հետո հանգիստ ընտանիքների հետ զբոսնել, ու դա մեր ամենամեծ ձեռքբերումն է։ Այս մասին այսօր հայտարարեց Գորիսի քաղաքապետ Առուշ Առուշանյանը դատարանի շենքի դիմաց լրագրողների հետ զույցում։
Նշենք, որ դատարանը այս պահին քննում է ԱՆ պրոբացիայի ծառայության պահանջը Առուշանյանին ազատազրկման վերաբերյալ։
Նա հավելեց նաև, որ հրաժարական չի պատրաստվում տալ, քանի որ իրեն ժողովուրդն է ընտրել, այն էլ երկու անգամ։
«Երկրորդ անգամ կալանքի տակ էի, մոտ 70 տոկոսը վստահության քվե տվեց։ Ինչ վերաբերում է՝ պատրաստ եմ կալանքի, թե ոչ, ես ամեն ինչի էլ պատրաստ եմ»,– ասաց նա։
Ինչ վերաբերում է իշխանությունների հետ համագործակցությանը, ապա Առուշանյանը նշեց, որ որևէ կաշկանդվածություն չունի իր տեսակետներն արտահայտելու։
«Շատերը ցանկանում են ներկայացնել, որ սա քաղաքական հետապնդում է։ Բազմիցս ասել եմ, որ 2020–ի նոյեմբերի 9–ից հետո իմ պայքարը չի եղել քաղաքական, ես պայքարել եմ Արցախի` մեր հողի համար»,– ասաց Գորիսի համայնքապետը։
Լուրերը, թե նա համալրել է «Քաղաքացիական պայմանագիր» կուսակցության շարքերը, Առուշանյանը հերքեց՝ ևս մեկ անգամ հիշեցնելով, որ նա կուսակցական չէ։
Հիշեցնենք, որ պրոբացիայի ծառայությունը դիմել էր Գորիս համայնքի ավագանուն՝ տեղեկացնելով, որ համայնքի ղեկավարը պետք է պաշտոնանկ արվի։ Ավագանու նիստի մասնակից 14 անդամները միաձայն արձանագրել են, որ գրության պահանջն ավագանու գործառույթներից դուրս է, առկա է այդ գործընթացը ավագանու կողմից կազմակերպելու անհնարինության վիճակ։
Գորիսի համայնքի ղեկավար Առուշ Առուշանյանը մեղադրվում է պաշտոնեական դիրքի չարաշահման, ինքնիրավչության, ինչպես նաեւ դիտավորությամբ այլ մարդու առողջությանը վնաս պատճառելու մեջ։ Դատական ակտը մտել է ուժի մեջ, բայց Առուշանյանը չի կատարում կետերից մեկը՝ հրաժարվել համայնքի ղեկավարի պետի պաշտոնից։ Ըստ դատավճռի՝ նա չի կարող 5 տարի պաշտոն զբաղեցնել։
Իր հերթին պրոբացիայի ծառայությունը դիմել է դատարան՝ Առուշ Առուշանյանի պատիժը ազատազրկմամբ փոխարինելու հայցով։ Գործը Սյունիքի մարզի ընդհանուր իրավասության դատարանի դատավոր Վարսենիկ Մելքոնյանի վարույթում է։