ԵՐԵՎԱՆ, 31 օգոստոսի–Sputnik. Բյուջեում ճեղքվածք չկա, բայց փողը երբեք շատ չի լինում․ ասուլիսի ժամանակ հայտարարեց ՀՀ վարչապետ Նիկոլ Փաշինյանը՝ խոսելով հարկային փոփոխությունների մասին, ներառյալ՝ տաքսիների հարկման նոր կարգը, ՊԵԿ-ի՝ շրջանառության մեջ դրած նոր օրենսդրական նախաձեռնությունը և այլն։
«Բյուջեի եկամուտները 2018-ից հետո աճել են և շարունակում են աճել, բայց կարիքներն օբյեկտիվ այնքան մեծ են, որ մեզ ավելի շատ գումարներ են հարկավոր»,- ասաց Փաշինյանը։
Նրա խոսքով՝ մեր երկրում ահռելի ստվեր կա, և դրա թիվ 1 հովանոցը շրջանառության հարկն է։
Նրա խոսքով՝ երբ կառավարությունը սոցիալական արտոնություններ է տալիս, հետո վերադառնում է՝ հասկանալու, թե ինչ արդյունքներ են դրանք տվել, շատ դեպքերում տեսնում է, որ այդ արտոնությունները կիրառվում են ստվերը մեծացնելու համար։
«Էդ հարկը հո ես մեր տուն չե՞մ տանում։ Ասում եք՝ կոռուպցիա, այո, կոռուպցիայի դեմ պայքարն էլ փող արժի, դա էլ ձրի չի, ինստիտուտներ ենք ստեղծել, որոնք պետք է ֆինանսավորել»,- նշեց վարչապետը։
Նրա խոսքով՝ հավաքված հարկերով պետական պատվերի տարբեր ծրագրեր են իրականացվում, ճանապարհներ, դպրոցներ են կառուցվում։ Ըստ նրա՝ պետական բյուջեի 90 և ավելի տոկոսը ծախսվում է քաղաքացիների կարիքների համար, մասնավորապես՝ ուսուցիչների, զինվորականների աշխատավարձեր են բարձրացվում, առողջապահական կարիքներ են բավարարվում և այլն։
«Մենք պետություն ուզում ենք ունենալ․ այն պետք է լինի անկախ, ինքնիշխան, ուժեղ և զարգացած»,- հայտարարեց վարչապետը։
Շեշտում է՝ պետություն ունենալն ամենաթանկ նախագծերից մեկն է, որը մարդը ստեղծել է. դրանից ավելի թանկ, թանկարժեք ու թանկագին բան չկա։