ԵՐԵՎԱՆ, 30 օգոստոսի–Sputnik. Արցախցի բռնցքամարտիկ Մանվել Պետրոսյանի խափանման միջոցը փոխվել, և նա կկարողանա մասնակցել Եվրոպայի առաջնությանը։ Ֆեյսբուքյան իր էջում այս մասին հայտնել է փաստաբան Արսեն Բաբայանը։
Նրա խոսքով՝ դատարանը բավարարել է «11-ի գործով» ներկայացված միջնորդությունը։
«Վարչական հսկողություն և բացակայելու արգելք խափանման միջոցները վերացնելով՝ դատարանը թույլատրեց, որպեսզի Մանվել Պետրոսյանը մասնակցի բռնցքամարտի Եվրոպայի առաջնությանը, որը տեղի կունենա Բուլղարիայում»,- գրել է Բաբայանը։
Փաստաբանը նաև կատակել է՝ եթե Մանվելն առանց մեդալի վերադառնա Բուլղարիայից, ապա կդադարի դատարանում նրա շահերը ներկայացնել։
Նշենք, որ Մանվել Պետրոսյանն անցնում է 2023թ․ սեպտեմբերի 19-ի զանգվածային անկարգությունների գործով։ Արցախի դեմ Ադրբեջանի իրականացրած հերթական ռազմական ագրեսիայից հետո մեծ թվով մարդիկ հավաքվեցին կառավարության շենքի մոտ՝ իշխանություններից պատասխան պահանջելով կատարվողի համար։ Բողոքի ակցիայի ժամանակ հրմշտոց և բախումներ էին սկսվել մասնակիցների և ոստիկանների միջև։