ԵՐԵՎԱՆ, 29 օգոստոսի – Sputnik. ՀՀ վարչապետ Նիկոլ Փաշինյանին չի գոհացնում դպրոցների ու հասարակական շինությունների արտաքին տեսքի սպասարկումը։ Այդ մասին նա հայտարարեց ՀՀ կառավարության նիստի ժամանակ։
Ըստ նրա` բոլոր շենքերը պետք է լինեն գունեղ, սակայն դրանց հանդիսավոր բացումից մի քանի տարի անց գեղեցիկ տեսքը կորցնում են ու նույնիսկ սեյսմակայունության խնդիր է առաջանում։
«Այդ ամեն ինչը պետք է թարմացվի։ Դա սպասարկման շատ կարևոր մաս է։ Օրինակ` դպրոցի ցանկապատը չպետք է լինի ժանգոտ. եթե մի քանի տարի այն չներկվի, կդառնա ժանգոտ։ Հարյուրավոր դպրոցների ցանկապատներ այսօր ժանգոտ են. անցնում ենք կողքով, ասում ենք` հա, ինչ, բայց քաղաքացու ցանկապատն էլ չպետք է լինի ժանգոտ, քանի որ դա վերաբերմունք է արտաքին միջավայրի և բնակավայրի նկատմամբ»,– հայտարարեց Փաշինյանը։
Նա պատմեց, որ Իջևանում սուբվենցիոն մի ծրագրի շրջանակում դիտարկում էին կատարված աշխատանքը, սակայն նկատել են, որ կառավարության միջոցներով վերանորոգված ճանապարհի կողքի ցանկապատները խարխուլ վիճակում են։
«Եթե կառավարությունը վերոնորգման համար 800 մլն կամ 1 մլրդ ներդրում է անում, ապա կարծում եմ` քաղաքացին էլ պետք է 8000 դրամի ներդրում անի, ներկ առնի, հարևաններով կամ համայնքով որոշեն այդ փողոցի ցանապատները ներկել այս նյութով ու այս գույնով»,– նշեց վարչապետը։
Ըստ նրա` նույնը վերաբերում է ձմռան ամիսներին։
«Քաղաքացին առավոտյան դուրս է գալիս փողոց, սայթաքում, ընկնում է ու դեռ բժշկի չդիմած` պառկած տեղից ուղիղ եթեր է մտնում ու ասում` կառավարության սենցը–նենցը։ Եղբա՛յր, քո տան դռան դիմաց դո՛ւ պետք է մաքրես։ Ժողովո՛ւրդ, համակեցությունը սա է, հակառակ դեպքում ազգային միասնություն չի լինի. ցավոք, դա էլ ենք պատկերացնում հնարավորինս հեռու մի տեղում` Նյու Յորքի պադվալներից մեկում ինչ–որ մի գրասենյակ, որտեղ թաքնված է այդ ազգային միասնությունը։ Ո՛չ։ Անընդհատ փնտրում ենք ինչ–որ մեկ ուրիշի, որ ինչ–որ բան պետք է անի ու անընդհատ չի անում։ Այդ դեպքում եկեք գնանք հայելու առաջ կանգնենք ու կգտնենք այդ ուրիշ մեկին։ Սա աքսիոմա է, կանոն է»,– հայտարարեց Փաշինյանը։
ԿԳՄՍ նախարար Ժաննա Անդրեասյանն իր հերթին հայտարարեց, որ նույնը վերաբերում է դպրոցների կահավորմանը, ինչը շատ հաճախ խոչըդնոտում են աշակերտների ազատ, ինքնուրույն մտածելուն։ Նա, որպես օրինակ, նշեց դպրոցական աթոռները, որոնք շատ ծանր են, ու երեխաների համար շատ դժվար է դրանք տեղաշարժել, մինչդեռ հնարավոր է` դասապրոցեսի ժամանակ լինեն շրջանաձև քննարկումներ, որոնց համար այդ աթոռներն անհարմար են։