ԵՐԵՎԱՆ, 25 օգոստոսի – Sputnik. 44–օրյա պատերազմում զոհված Ավագ Ավետիսյանի ծնողները որդու կորստից տարիներ անց ժպտալու առիթ ունեն։ Զույգ աղջիկները` Լուսէն ու Լիզան, վերաիմաստավորել են նրանց կյանքը։
Աղջիկներն արդեն գրեթե երկու ամսական են, ծնվել են 38 սմ հասակով, 1450գ և 1300գ քաշով։
44–ամյա Աննա Սարգսյանը «Զինուժի» թղթակցին պատմել է, որ երեխաներին խնամելու հարցում իրեն շատ է օգնում ավագ դուստրը` 20 ամյա Ասլին։
«Մինչ զույգերի ծնվելը կարող էր այնպես լինել, որ նստեինք ամուսնուս հետ ու ժամերով չխոսեինք, իսկ հիմա ամեն ինչ փոխվել է։ Երկուսիս մոտ էլ մի ուրիշ էմոցիաներ են սկսվել, կարծես 20 տարի հետ գնացած լինենք»,– ասում է Աննա Սարգսյանը։
Տիկին Աննան խոստովանում է, որ մայրանալու որոշում կայացնելը հեշտ չի եղել, բայց երազում Ավագին տեսնելուց հետո որոշել է գնալ այդ քայլին։
«Երազիս եկավ ու ասաց, որ վերդառնալու է»,– ասում է նա։
Չնայած տիկին Աննան շատ էր ուզում տղա ունենալ, բայց աղջիկներն էլ նրա համար Աստծո պարգև են։ Հիմա անհամբերությամբ սպասում է, թե երբ են աղջիկները խոսելու, որ Ավագի փոխարեն իրեն «մամա» ասեն։