ԵՐԵՎԱՆ, 23 օգոստոսի – Sputnik. «Փյունիկ» ակումբի ֆուտբոլիստ Սանի Բուհարին երջանիկ է, որ մարզիչը հավատացել է իրեն ու ընդգրկել Կոնֆերենցիաների լիգայի որակավորման փլեյ-օֆֆի «Փյունիկ» - «Ցելե» խաղի մեկնարկային կազմում, որտեղ ինքը միակ գոլի հեղինակն է դարձել։ Այս մասին նա ասել է «Փյունիկ» ֆուտբոլային ակումբի հետ հարցազրույցում։
«Ես չեմ կարող նկարագրել էմոցիաներս, քանի որ շատ երջանիկ եմ: Սա իմ առաջին խաղն էր, առաջին գոլը, ես միշտ աղոթել եմ Աստծուն, որ մեկ հնարավորություն տա, քանի որ պետք է խաղամ, բայց մեծ ֆուտբոլիստ չեմ: Այնուամենայնիվ, մարզիչը հավատաց ինձ ու ընդգրկեց մեկնարկային կազմում: Ես փորձեցի անել առավելագույնը, որպեսզի օգնեմ թիմին, Աստված ինձ օգնեց գոլ խփել»,–ասել է ֆուտբոլիստը։
Նա ընդգծել է, որ ֆուտբոլային ակումբում շրջապատված է հիանալի խաղացողներով, որոնք իր վրա չեն բղավում սխալվելու դեպքում։
«Նրանք ինձ աջակցում են, քաջալերում, ճիշտ ուղին են ցույց տալիս, նրանք ասում են` Սանի՛, խաղա՛, դու կարող ես անել դա: Ես մտածում էի, որ եթե սխալվեմ, մեկը կգոռա, կասի` ինչո՞ւ, Սանի՛, բայց ոչ, նույնիսկ մարզիչը ինձ միշտ օգնում է: Ես ինձ լավ եմ զգում այստեղ, այդ պատճառով լավ եմ խաղում»,–ասել է նա:
Սանին համարում է, որ «Ցելեի» թիմը ուժեղ է, բայց իրենք ճիշտ են մտածել ու գործել։
Ֆուտբոլիստը հույս ունի, որ իր թիմի երկրպագուները կաղոթեն իրենց համար, որպեսզի հասնեն իրենց նպատակներին:
Հիշեցնենք, որ Բուհարին «Փյունիկ» է տեղափոխվել հայկական մեկ այլ ակումբից՝ «Վանից»: