ԵՐԵՎԱՆ, 22 օգոստոսի- Sputnik, Խաչիկ Չախոյան. Երևանի «Փյունիկը» Կոնֆերենցիաների լիգայի փլեյ-օֆֆի առաջին խաղում Սանի Բուհարիի խփած միակ գնդակի շնորհիվ հաղթանակի հասավ սլովենական «Ցելյե» թիմի նկատմամբ։
Կադրեր «Փյունիկ» - «Ցելեյ» հանդիպումից. Կոնֆերենցիաների լիգայի փլեյ–օֆֆ
© Sputnik
Առաջին խաղակեսում հավասար պայքար էր ծավալվել։ Երկու թիմերն էլ բավականին զգուշություն էին դրսևորում` փորձելով առաջին հերթին անառիկ պահել սեփական դարպասը։ Դրանից իհարկե տուժում էր հարձակումը, ինչի պատճառով էլ կողմերը բավականին երկար ժամանակ ճիշտ է սպառնալիքներ ստեղծում էին, բայց գործը գոլային իրական պահերի չէր հասնում։ Միայն 41-րդ րոպեին Ագդոն Մենեզեսը վտանգավոր հարված կատարեց, բայց իր բարձրության վրա էր հյուրերի դարպասապահը։
Կադրեր «Փյունիկ» - «Ցելեյ» հանդիպումից. Կոնֆերենցիաների լիգայի փլեյ–օֆֆ
© Sputnik
Երկրորդ խաղակեսի մեկնարկում «Փյունիկը» որոշակի ճնշում գործադրեց մրցակցի վրա։ Մեր թիմը նկատելիորեն ակտիվացել էր։ Եվ այդ ակտիվությունը շատ արագ ծառայեց նպատակին։ Սանի Բուհարին ընթացքից շրջանցելով մրցակցի երկու ֆուտբոլիստի «Ցելյեի» տուգանայինի մատույցներից դիպուկ հարվածով գնդակն ուղարկեց հյուրերի դարպասը` առաջ մղելով «Փյունիկին»։ Քիչ անց Բուհարին շատ լավ հնարավորություն ուներ նաև կրկնապատկել հաշիվը, բայց, չգիտես ինչու, դատարկ դարպասին հարվածելու փոխարեն փոխանցում կատարեց։
Կադրեր «Փյունիկ» - «Ցելեյ» հանդիպումից. Կոնֆերենցիաների լիգայի փլեյ–օֆֆ
© Sputnik
«Փյունիկն» արդեն զգալիորեն գերազանցում էր մրցակցին գոլային պահերով։ Մարտին Մայան և Յուսուֆ Օտուբանջոն հրաշալի հնարավորություն ունեցան զարգացնելու հայկական թիմի առավելությունը, բայց կամ դարպասապահ Մաթյաժ Ռոզմանը գերազանց էր գործում, կամ էլ մերոնք վրիպում էին նպաստավոր դիրքերից։ Խաղն ավարտվեց «Փյունիկի» նվազագույն առավելությամբ, հետևաբար պատասխան հանդիպումը դարձավ այս դիմակայությունում առանցքայինը։
Կադրեր «Փյունիկ» - «Ցելեյ» հանդիպումից. Կոնֆերենցիաների լիգայի փլեյ–օֆֆ
© Sputnik
Պատասխան հանդիպումը «Ցելյեի» և «Փյունիկի» միջև կայանալու է մեկ շաբաթ անց՝ օգոստոսի 29-ին, Սլովենիայում։