ԵՐԵՎԱՆ, 21 օգոստոսի – Sputnik. Եգիպտոսը պատրաստ է պատվաստանյութեր և շիճուկներ մշակել կապիկի ծաղիկի դեմ և աջակցել Աֆրիկայի երկրներում համաճարակների դեմ պայքարին։ ՌԻԱ Նովոստիի հետ զրույցում այս մասին հայտնել է երկրի առողջապահության նախարարության ներկայացուցիչ Հուսամ Աբդել Գաֆարը։
Նրա խոսքով՝ թեև Եգիպտոսում կապիկի ծաղիկի դեպքեր չեն գրանցվել, բայց իշխանությունը պատրաստ է դիմակայել հնարավոր համաճարակներին՝ հաշվի առնելով հարևան երկրներում գրանցված վերջին բռնկումները:
«Կապիկի ծաղիկ է գրանցվել Աֆրիկայի մի քանի երկրում։ Հաշվի առնելով դրա վտանգը՝ մենք պատրաստ ենք պատվաստանյութեր և շիճուկներ ստեղծել այդ հիվանդության դեմ», – ասել է Գաֆարը՝ ընդգծելով բնակչության պաշտպանության համար կանխարգելիչ միջոցառումների կարևորությունը։
Եգիպտոսի իշխանությունները հատուկ ուշադրություն են դարձնում Սուդանում տիրող իրավիճակին, որտեղ վերջերս խոլերայի բռնկում է տեղի ունեցել, և դրա հետևանքով ավելի քան 20 մարդ է մահացել: Այս կապակցությամբ Եգիպտոսը բարձրացրել է պատրաստվածության մակարդակը և ուժեղացրել վերահսկողության միջոցառումները Սուդանի հետ սահմանին՝ վարակի հնարավոր տարածումը կանխելու համար:
Օգոստոսի 14-ին Առողջապահության համաշխարհային կազմակերպությունը (ԱՀԿ) վերջին երկու տարում արդեն երկրորդ անգամ հայտարարել է հանրային առողջապահության ոլորտում միջազգային նշանակության արտակարգ իրավիճակ, ինչը պայմանավորված է Կոնգոյում և Աֆրիկայի որոշ երկրներում կապիկի ծաղիկ հիվանդության դեպքերի աճով, ինչպես նաև սեռական ճանապարհով փոխանցվող վիրուսի նոր շճախմբի տարածմամբ:
Կապիկի ծաղիկը վիրուսային ծագման հիվանդություն է, որը հիմնականում արձանագրվում է Կենտրոնական և Արևմտյան Աֆրիկայի որոշ երկրներում:
Վիրուսը փոխանցվում է կա՛մ վարակված կենդանու կծելուց, կա՛մ վայրի կենդանու միսն ու մորթին օգտագործելուց, հազվադեպ՝ մարդու կամ վիրուսով բաղարկված նյութի հետ շփումից: Վիրուսն օրգանիզմ է թափանցում վնասված մաշկի, շնչառական ուղիների կամ լորձաթաղանթների (աչք, քիթ, բերան, սեռական ուղի) միջոցով:
Գաղտնի շրջանը 5-21 օր է: Ախտանշանները` տենդ, սաստիկ գլխացավ, լիմֆատիկ հանգույցների մեծացում, ցավ մեջքի շրջանում, մկանացավ, արտահայտված թուլություն:
Տենդի սկզբից 1-3 օր անց ի հայտ է գալիս ցանավորումը, որը սկսվում է դեմքի շրջանից, ապա տարածվում մարմնի տարբեր հատվածներում:
Հիվանդությունը սովորաբար թեթև է ընթանում, շատերը վերականգնվում են մի քանի շաբաթվա ընթացքում, սակայն որոշ դեպքերում կարող է հանգեցնել բարդությունների և նույնիսկ մահվան (մահաբերությունը` 0-11%):
Ապացուցվել է, որ նախկինում բնական ծաղիկի դեմ կատարված պատվաստումը 85%-ով արդյունավետ է նաև կապիկի ծաղիկ հիվանդության համար։ ԱՀԿ-ի կողմից հաստատված երկու պատվաստանյութ է օգտագործվում այս հիվանդության դեմ: