ԵՐԵՎԱՆ, 19 օգոստոսի – Sputnik. Դատախազությունը ՀՀ երրորդ նախագահ Սերժ Սարգսյանի եղբայր Ալեքսանդր Սարգսյանից, նրա կնոջից ու երկու որդիներից պահանջում է բռնագանձել 14 գույք ու 3.5 միլիարդ դրամ։ Այս մասին հայտնում է Հանրային հեռուստաընկերությունը։
Նշվում է, որ 14 գույքից 4–ը Երևանի կենտրոնում են, 10–ը` Կոտայքի մարզում։ Ապօրինի են համարվել նաև 4 տրանսպորտային միջոցներ, 1 մլրդ դրամի ավանդ ու պարտատոմսեր, ինչպես նաև մասնակցություններ իրավաբանական անձերում։
Դատախազությունը Ալեքսանդր Սարգսյանի գույքը սկսել է ուսումնասիրել 2021 թ–ից`ԱԱԾ–ից ստացված օպերատիվ հետախուզական տվյալների հիման վրա։ Դատախազությունը ուսումնասիրությամբ հետ է գնացել մինչև 1995 թ. ու առաջին ապօրինի գույքը դիտարկել է 1998–ին ձեռք բերված անշարժ գույքը կոտայքի մարզի Բալահովիտ համայնքում։
Ալեքսանդր Սարգսյանին պատկանող ամբողջ գույքի վրա դատարանի որոշմամբ կալանք է դրվել։
Ավելի վաղ հայտնել էինք, որ Ալեքսանդր Սարգսյանը և նրա ընտանիքի անդամները դատախազություն էին հրավիրվել օգոստոսի 13-ին։
«Բոլոր անձինք օրենքով սահմանված կարգով ծանուցվել են ուսումնասիրության առկայության մասին, հրավիրվել են դատախազություն նյութերին ծանոթանալու, դիրքորոշում հայտնելու նպատակով։ դեռևս որևէ մեկը չի ներկայացել դատախազություն»,– ասում է ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչության ավագ դատախազ Գևորգ Քոչարյանը։
Փոխարենը Սարգսյանների փաստաբանն է կապ հաստատել դատախազության հետ ու հայտնել, որ առաջիկա օրերին նրանք կներկայանան։
Հիշեցնենք, որ 2019թ–ին Ալեքսանդր Սարգսյանի նկատմամբ քրեական գործ էր հարուցվել։ Նա մեղադրվում էր առանձնապես խոշոր չափերի խարդախության մեջ։
Քրեական գործով մեղադրյալ Ալեքսանդր Սարգսյանն իր կամքով 9 506 000 000 դրամին համարժեք 19 600 000 դոլար նվիրաբերեց Արցախի Հանրապետության պաշտպանության բանակին։