Աղետի գոտում ո՞ւմ պետք է փոխհատուցել առաջինը` շատ հարկ վճարողի՞ն, թե՞ թույլին. կարծիքներ

ԵՐԵՎԱՆ, 16 օգոստոսի – Sputnik. Պետության խնդիրը պետք է լինի ոչ թե շատ հարկ վճարողին առաջնահերթ օժանդակելը, այլ առավել թույլերին ավելի շատ ուշադրություն դարձնելը։ Sputnik Արմենիայի հետ զրույցում այս մասին ասաց «Քաղաքացի–հարկատու–բիզնես» իրավապաշտպան կազմակերպության փոխնախագահ Էդուարդ Բադալյանն` անդրադառնալով Լոռու և Տավուշի մարզերում աղետից տուժած տնտեսվարողներին վերաբերող որոշմանը։

ՀՀ կառավարությունն օգոստոսի 15-ին որոշեց Լոռու և Տավուշի մարզերում աղետից տուժած տնտեսվարողներին մոտ 300 մլն հավելյալ աջակցություն տալ։ Աջակցության տրամադրման չափի համար հաշվի է առնվում վնասի աստիճանը, որը դասակարգվել է ցածր, միջին և բարձր։ Գումարը կհատկացվի երկու բաղադրիչով` ըստ ձեռնարկատերերի անշարժ գույքի մակերեսի և ըստ պետական բյուջե վճարած հարկի չափերի։

Բադալյանի խոսքով` կառավարության այս առաջարկի տրամաբանությունը հասկանալի է, բայց մոտեցումը հասկանալի չէ ու որ լավագույնը։

Բադալյանի կարծիքով` պետության գործառույթը տվյալ դեպքում չպետք է լինի այն, որ ով շատ հարկ է տվել, նրան էլ շատ փոխհատուցում տա, այլ արդար օգնելը։

Համայնքային կառավարման փորձագետ Դավիթ Մարգարյանը տրամաբանական է համարում կառավարության որոշումը։

«Ամենայն հավանականությամբ, այս որոշումը բիզնեսի ծավալի գնահատման մասին է, որպեսզի տուժած տնտեսվարողին ըստ իր շրջանառության տրվի փոխհատուցում»,– Sputnik Արմենիայի հետ զրույցում ասաց նա։

Մարգարյանը լիրիկական հայտարարություն է համարում ՀՀ վարչապետ Նիկոլ Փաշինյանի այն խոսքերը, թե տնտեսվարողներն իրենց վճարած հարկերը չպետք է ընկալեն որպես գումարը ուրիշին տալու պրոցես, այլ որպես փողը մի գրպանից մյուսը գրպանը դնել, որը հետո սև օրվա համար պետք կգա։

Նա ընդգծեց` իշխանությունները լավ տիրապետում են հարկ վճարողների բազային ու շատ լավ գիտեն` ով, երբ, որքան հարկ է վճարել ու ինչ միջոցների է տիրապետում։ Ըստ այդմ, Մարգարյանի խոսքով, փոխհատուցում տրամադրելու համար նրանք արդեն իսկ ունեն օբյեկտիվ հիմք։