ԵՐԵՎԱՆ, 14 օգոստոսի – Sputnik. Երևանի Ավան և Նոր Նորք վարչական շրջանների ընդհանուր իրավասության դատարանը մերժեց «Իմնեմնիմի» հաղորդման համահեղինակներ Նարեկ Սամսոնյանի ու Վազգեն Սաղաթելյանի նկատմամբ էլեկտրոնային հսկողություն կիրառելու միջնորդությունը, որը ներկայացրել էր դատախազությունը։
Դատավոր Արման Հովհաննիսյանն ասաց, որ Սաղաթելյանն ու Սամսոնյանը գտնվում են վարչական հսկողության տակ, և էլեկտրոնային հսկողություն կիրառելու կարիք չկա։
Հիշեցնենք` մարտի 22-ի առավոտյան ոստիկանության աշխատակիցներն ավտոկայանատեղիում մի քանի հոգով թիկունքից հարձակվել ու անհամաչափ բիրտ ուժի կիրառմամբ գետնին էին տապալել Նարեկ Սամսոնյանին, ապա ձերբակալել նրան։ Այնուհետև իրավապահները գնացել էին նաև Վազգեն Սաղաթելյանի տան մոտ և դատարանի որոշումը ներկայացնելուց հետո ձերբակալել նրան։
Նրանց մեղադրանք էր առաջադրվել հաղորդակցական տեխնոլոգիաներն օգտագործելով խմբի կազմում խուլիգանություն կատարելու համար։
Նարեկ Սամսոնյանն ու Վազգենը Սաղաթելյանն ազատությունից զրկվել էին ՀՀ վարչապետ Նիկոլ Փաշինյանի հայտարարությունները կոշտ բառապաշարով քննարկելուց հետո։
Երևանի ընդհանուր իրավասության դատարանի դատավոր Արման Հովհաննիսյանը մայիսի 21-ին որոշում կայացրեց, համաձայն որի` Սամսոնյանն ու Սաղաթելյանն ազատ արձակվեցին։ Խափանման միջոց կալանքը վերացվեց, նրանց նկատմամբ ընտրվեց վարչական վերահսկողություն, նրանք 3 ամիս չեն կարող վարել «Իմնեմնիմին» կամ որևէ այլ հաղորդում։