ԵՐԵՎԱՆ, 9 օգոստոսի – Sputnik. Իտալական «Նապոլին» պատրաստ է ընդունել Էդուարդ Սպերցյանին, բայց միայն այն դեպքում, եթե տրանսֆերային պատուհանի արդյունքներով թիմում չզբաղեցված տեղեր մնան, հակառակ դեպքում Էդուարդը Կրասնոդարում կմնա մինչև ձմեռ։ Այս մասին գրում է իտալական «PianetaNapoli» կայքը։
Օրերս «Նապոլիի» մարզական տնօրեն Ջովաննի Մանանան հայտարարել էր, որ ակումբը հետաքրքրություն չի ցուցաբերել հայ ֆուտբոլիստի նկատմամբ: Լրատվամիջոցը պնդում է, որ Սպերցյանին նեապոլյան թիմին առաջարկել է նրա գործակալը՝ Ռաֆայելա Պիմենտան (հայտնի Մինո Ռայոլայի մահից հետո գլխավորում է գործակալական ընկերությունը. խմբ.):
«Այդ խաղացողը կարող է լավ ձեռքբերում դառնալ, ուստի նրա հանդեպ պետք է ուշադիր լինել։ Էդուարդը խաղում է հարձակողական կիսապաշտպանի դերում՝ հիմնականում գտնվելով խաղադաշտի կենտրոնի և ձախ թևի միջև։ Նա գրոհների լավ նախաձեռնող է և կարող է ինքնուրույն միանալ դրանց՝ տուգանային հրապարակի մատույցներում ստեղծելով թվային առավելություն։ «Կրասնոդարում» նա դարպասը հաջողությամբ խոցում է տարբեր անկյուններից։ Նա նաև արդյունավետ փոխանցումներ է անում։Այս բոլոր հատկանիշների ամբողջությունը հաշվի առնելով՝ նրան կարելի է անվանել Հենրիխ Մխիթարյանի արժանի ժառանգորդ»,– գրում է լրատվամիջոցը։
Նշենք, որ հունիսին «Սպորտ Էքսպրեսը», հղում անելով «Transfermarkt»-ի տվյալներին, կազմել Է Ռուսաստանի առաջնության ամենաթանկ ֆուտբոլիստների հնգյակը: Սպերցյանը 20 միլիոն եվրո տրանսֆերային արժեքով 1-ին տեղն է կիսել իր նախկին ակումբակից, դարպասապահ Մատվեյ Սաֆոնովի (վերջերս տեղափոխվել է փարիզյան «ՊՍԺ»), ինչպես նաև Սանկտ Պետերբուրգի «Զենիթի» բրազիլացի կիսապաշտպան Վենդելի հետ: