ԵՐԵՎԱՆ, 7 օգոստոսի - Sputnik. Կիևի ռեժիմը հերթական լայնածավալ սադրանքն է ձեռնարկել՝ կազմակերպելով ներխուժումը Կուրսկի մարզ: Այս մասին հայտարարել է Ռուսաստանի նախագահ Վլադիմիր Պուտինը՝ տեսակապի ձևաչափով կառավարության անդամների հետ խորհրդակցության ժամանակ:
Նա նշել է, որ ուկրաինական զինված ուժերը տարբեր զինատեսակներից, այդ թվում ՝ հրթիռային, առանց տարբերակման կրակում են քաղաքացիական շենքերի, բնակելի տների, շտապօգնության մեքենաների ուղղությամբ:
Պուտինը հանձնարարել է առաջին փոխվարչապետ Դենիս Մանտուրովին՝ սկզբնական փուլում համակարգել Կուրսկի շրջանի իրավիճակի վերաբերյալ քաղաքացիական գերատեսչությունների աշխատանքը: «Խնդրում եմ կառավարության անդամներին՝ անհապաղ զբաղվել այդ հարցով», - հայտարարել է նա:
Նախարարների կաբինետի խորհրդակցությունից հետո ՌԴ նախագահը կլսի իրավիճակի վերաբերյալ ուժային գերատեսչությունների զեկույցը։
Ներկա դրությամբ Ռուսաստանի զորքերը ԱԴԾ սահմանապահ մարմինների հետ շարունակում են Կուրսկի մարզի սահմանամերձ շրջաններում Ուկրաինայի զինված ուժերի կազմավորումների ոչնչացման գործողությունը:
Ուկրաինայի զինված ուժերը օգոստոսի 6-ի առավոտյան փորձել են ներխուժել Կուրսկի մարզի տարածք։ Ռուսաստանի պաշտպանության նախարարությունը հայտնել է, որ ուկրաինական զինված ուժերը մինչև 300 միավոր անձնակազմով ՝ 11 տանկերի և ավելի քան 20 զրահամեքենաների աջակցությամբ, հարձակվել են Նիկոլաևո-Դարյինո և Օլեշնյա բնակավայրերի շրջաններում ՌԴ պետական սահմանը հսկող ստորաբաժանումների դիրքերի վրա։ Կուրսկի մարզպետի ժամանակավոր պաշտոնակատար Ալեքսեյ Սմիռնովի տեղեկություններով՝ սահմանապահները և ՌԴ ԶՈն-ն սահմանին ոչնչացրել են Ուկրաինայի զինված ուժերի 16 միավոր տեխնիկա: Իր հերթին, օգոստոսի 7-ի առավոտյան ՌԴ առողջապահության նախարարի օգնական Ալեքսեյ Կուզնեցովը հայտնել է, որ Կուրսկի շրջանում կրակոցների հետևանքով վիրավորվել և վնասվածքներ է ստացել 24 մարդ, այդ թվում՝ 6 երեխա:
Օգոստոսի 7-ին ՌԴ պաշտպանության նախարարությունը հայտնել է, որ գիշերվա ընթացքում ՌԴ ԶՈՒ ստորաբաժանումները Ռուսաստանի ԱԴԾ սահմանապահ մարմինների հետ համատեղ շարունակել են ոչնչացնել Ուկրաինայի զինված ուժերի կազմավորումները Կուրսկի մարզի այն հատվածներում, որոնք հարում են ռուս-ուկրաինական սահմանին: Գերատեսչությունը ճշտել է, որ ուկրաինական բանակի կորուստները կազմել են մինչև 260 զինյալ և 50 միավոր զրահատեխնիկա, այդ թվում՝ 7 տանկ, 8 զրահամեքենա, 3 հետևակի մարտական մեքենա: