ԵՐԵՎԱՆ, 5 օգոստոսի - Sputnik. M դասի միջին պայթյունների հաջորդականությունից հետո X դասի երկու հզոր բռնկումներ են տեղի ունեցել Արեգակի վրա․ առայժմ դրանց հնարավոր ազդեցությունը Երկրի մագնիսական ոլորտի նկատմամբ գիտնականները գնահատում են որպես քիչ հավանական: Այս մասին ՌԻԱ Նովոստիին հայտնել է Ռուսաստանի գիտությունների ակադեմիայի տիեզերական հետազոտությունների ինստիտուտի արևային աստղագիտության լաբորատորիայի ղեկավար Սերգեյ Բոգաչովը։
«Իրադարձությունը, որը շարունակ սպասվում էր, բայց ոչ մի կերպ տեղի չէր ունենում՝ այնուամենայնիվ կատարվեց։ M դասի (5–բալանոց սանդղակով 4-րդ մակարդակ, – խմբ․) շարունակական պայթյուններն, այնուամենայնիվ, հանգեցրին ամենաբարձր՝ 5-րդ մակարդակի պայթյունների մեկնարկին: Միանգամից երկու նման իրադարձություն է այսօր տեղի ունեցել Արեգակի վրա» - ասել է գիտնականը։
Բոգաչովը պարզաբանել է, որ երկու պայթյուններն էլ Արեգակի սկավառակի ծայրամասում էին և գրանցվել են օպտիկական միջոցներով։ Դրանցից առաջինն Արեգակի արևմտյան աջ ծայրամասում է, այսինքն՝ Երկրից դեպի Արեգակի հակառակ կողմը ձգվող ակտիվ կենտրոններում։ Երկրորդն էլ նկատվել է հակադիր՝ արևելյան (ձախ) ծայրամասում, որտեղ գտնվում են դեպի Երկիր ձգվող ակտիվ կենտրոնները։
Նա ընդգծել է, որ դրանցից Երկրին սպառնացող վտանգը քիչ հավանական է, քանի որ ծայրամասերը չափազանց հեռու են դեպի մեր մոլորակ ուղղվելուց, իսկ բռնկումներից հետո տիեզերք պլազմայի արտանետումներ չեն գրանցվել:
Բոգաչովի խոսքով ՝ Արեգակն, ըստ ամենայնի, աստիճանաբար ելնում է ակտիվության շարունակական ռեժիմի։ Դիտարկելով բծերի գտնվելու վայրը՝ դժվար է նույնիսկ կանխատեսել, թե երբ է ակտիվությունը նվազում, և առաջիկա ամիսներին այն ընդհանրապես կնվազի՞ արդյոք։