ԵՐԵՎԱՆ, 2 օգոստոսի – Sputnik. Իսրայելի արտաքին գործերի նախարար Իսրայել Կացը հանձնարարել է խիստ նկատողություն հայտարարել Թուրքիայի փոխդեսպանին, քանի որ ՀԱՄԱՍ-ի քաղբյուրոյի առաջնորդ Իսմայիլ Հանիայի սպանության պատճառով իջեցվել է Թել Ավիվում Թուրքիայի դեսպանատան դրոշը։
«Իսրայելի պետությունը չի հանդուրժի վշտակցման դրսևորումներ այնպիսի մարդասպանի համար, ինչպիսին Իսմայիլ Հանիան է, որը ղեկավարել է ՀԱՄԱՍ–ը հոկտեմբերի 7-ի ոճրագործությունների ժամանակ և աղոթել է իր համախոհների հետ՝ հաջողություն մաղթելով մարդասպաններին, հեռուստատեսությամբ դիտելով սարսափելի կադրերը», - նշել է Կացը X սոցիալական ցանցում:
Իսրայելի նախարարի խոսքով՝ եթե դեսպանատան ներկայացուցիչները ցանկանում են իրենց վշտակցությունը հայտնել, ապա պետք է գնան Թուրքիա և սգան իրենց տիրոջ` Էրդողանի հետ, որն աջակցում է ահաբեկչական ՀԱՄԱՍ կազմակերպությանը, նրա սպանություններին ու ահաբեկչություններին։
Նշենք, որ ՀԱՄԱՍ-ի քաղբյուրոյի ղեկավար Իսմայիլ Հանիայի սպանությունից հետո Թուրքիայի նախագահ Ռեջեփ Թայիփ Էրդողանը մեկօրյա ազգային սուգ էր հայտարարել երկրում։
Հիշեցնենք` պաղեստինյան ՀԱՄԱՍ շարժումը հուլիսի 31-ին հայտնել էր, որ Իրանի նորընտիր նախագահ Մասուդ Փեզեշքիանի երդմնակալության արարողությանը մասնակցելուց անմիջապես հետո Իսմայիլ Հանիան և նրա թիկնապահը սպանվել են Հանիայի` Թեհրանում գտնվող կեցավայրում։ Ինչպես գրում են արաբական ԶԼՄ-ները, հղում անելով սեփական աղբյուրներին, ՀԱՄԱՍ-ի քաղբյուրոյի ղեկավարը սպանվել է հրթիռի ուղիղ հարվածի հետևանքով։
ՀԱՄԱՍ-ը Հանիայի մահվան պատասխանատվությունը դրել է Իսրայելի և ԱՄՆ-ի վրա և հայտարարել, որ այդ հարձակումն անպատասխան չի մնա: Պենտագոնի ղեկավար Լլոյդ Օստինը հայտարարել է, որ ինքը ոչինչ չունի ասելու ՀԱՄԱՍ-ի քաղբյուրոյի ղեկավարի մահվան և Իսրայելի մասնակցության թեմայով: Իսրայելի բանակի ներկայացուցիչներն իրենց հերթին հայտարարել են, որ չեն արձագանքում Հանիայի սպանության մասին հաղորդագրություններին: «Jerusalem Post»–ը գրել է, որ Իսրայելի իշխանությունները նախարարներին հանձնարարել են չխոսել ՀԱՄԱՍ-ի առաջնորդի սպանության մասին: