ԵՐԵՎԱՆ, 30 հուլիսի– Sputnik. Կոնֆերենցիաների լիգայի որակավորման երկրորդ փուլի պատասխան խաղում «Փյունիկը» սեփական հարկի տակ հաղթեց Հյուսիսային Մակեդոնիայի «Ստրուգա» ակումբին։ Խաղն ավարտվեց 3:1 հաշվով։
Առաջին գոլը «Փյունիկի» կազմում խփեց կոտդիվուարցի ֆուտբոլիստ Սերժ Դեբլեն: Երկրորդ գոլը մակեդոնացիների դարպաս ուղարկեց Միխայիլ Կովալենկոն:
Առաջին խաղակեսի ավելացված վերջին րոպեներին երևանյան թիմը գոլ բաց թողեց, ու խաղակեսն ավարտվեց 2:1 հաշվով:
Երկրորդ խաղակեսի ավելացված վերջին րոպեին կրկին աչքի ընկավ Կովալենկոն ու հաշիվը դարձրեց 3:1։
Հիշեցնենք, որ Հյուսիսային Մակեդոնիայում կայացած առաջին խաղում «Փյունիկը» պարտվել էր 1:2 հաշվով:
Այս խաղից հետո ընդհանուր հաշիվը դարձավ 4:3, ու «Փյունիկն» այսպիսով դուրս եկավ որակավորման երրորդ փուլ: