ԵՐԵՎԱՆ, 30 հուլիսի – Sputnik. Միջազգային օլիմպիական կոմիտեն կոչ է արել խթանել փոխըմբռնումն ու հարգանքը խաղադաշտում և դրանից դուրս։ Այսպես է արձագանքել կոմիտեի նախագահ Թոմաս Բախը ՀԱՕԿ նախագահ Գագիկ Ծառուկյանի նամակին։ Այդ մասին տեղեկացնում է Հայաստանի ազգային օլիմպիական կոմիտեն։
Ավելի վաղ հայտնել էինք, որ ՀԱՕԿ նախագահ Գագիկ Ծառուկյանը դիմել է ՄՕԿ նախագահ Թոմաս Բախին և միջազգային օլիմպիական շարժման գործընկերներին՝ կոչ անելով ջանքեր գործադրել Բաքվում պահվող հայ գերիներին ազատ արձակելու ուղղությամբ։
Պատասխան նամակում Բախը, մասնավորապես, գրել է, որ ՄՕԿ-ը խաղաղության կողմնակից է, և իրենց մտքերն ու զգացմունքները մնում են անմեղ զոհերի և մարդկանց հետ, որոնք տուժել են մեծ թվով կոնֆլիկտներից և պատերազմներից ամբողջ աշխարհում։
«Մենք կոչ ենք անում բոլոր ազգային օլիմպիական կոմիտեներին և նրանց համապատասխան ղեկավարություններին, թիմերի ղեկավարներին և մարզիկներին՝ իրենց ներդրումն ունենալ խաղաղության գործում՝ խթանելով փոխըմբռնումն ու հարգանքը խաղադաշտում և դրանից դուրս՝ օլիմպիական արժեքներին և օլիմպիզմի հիմնարար սկզբունքներին համապատասխան»,– գրել է Բախը։
Նա նաև վստահեցրել է, որ շարունակում են հույս ունենալ, որ կարելի է գտնել խաղաղ լուծում, ինչը ներկայացվեց Օլիմպիական ավանում զինադադարի որմնանկարի բացմամբ։ ՄՕԿ–ի նախագահը տեղեկացրել է, որ կոմիտեն հանդես է գալիս շարունակական կոչերով՝ ուղղված բոլոր կառավարություններին, որպեսզի խաղաղությանը շանս տրվի։
Հիշեցնենք, որ պաշտոնական տվյալներով՝ Ադրբեջանում գտնվում է 23 հայ գերի` ներառյալ Արցախի ռազմաքաղաքական ղեկավարությունը։
Ադրբեջանցի սահմանապահները 2023 թվականի սեպտեմբերի վերջին ձերբակալեցին Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին։