ԵՐԵՎԱՆ, 30 հուլիսի - Sputnik. Անհեթեթ են այն հայտարարությունները, թե իբր Ռուսաստանը մտադիր է ազդել ԱՄՆ նախագահական ընտրությունների վրա։ Այս մասին ասել է ՌԴ նախագահի մամուլի քարտուղար Դմիտրի Պեսկովը:
Ընդհանրապես, ըստ նրա, այդպիսի հայտարարություններ շատ կլինեն ընտրությունների մոտենալուն զուգընթաց, ընդ որում՝ Ռուսաստանի և նախագահ Վլադիմիր Պուտինի թեման նախընտրական պայքարի ընթացքում շահագործում են և՛ դեմոկրատները, և՛ հանրապետականները:
«Ռուսաստանն ու ռուսական պետության ղեկավարն անձամբ, ըստ էության, էական գործոններ են քաղաքական պայքարի ընթացքում, հատկապես նախընտրական քարոզարշավում»,- լրագրողներին ասել է Պեսկովը:
Դա, ՌԴ նախագահի մամուլի քարտուղարի խոսքով, «գրեթե անուղղելի վնաս է հասցնում» երկկողմ հարաբերություններին։
Ավելի վաղ ԱՄՆ ազգային հետախուզության տնօրենի գրասենյակը հայտարարել էր, որ Ռուսաստանը, Չինաստանն ու Իրանը մարկետինգային, հաղորդակցական և այլ ընկերություններն իբր օգտագործում են ամերիկացի ընտրողների և առաջիկա նախագահական ընտրությունների արդյունքների վրա ազդելու համար:
Ավելի վաղ Պեսկովը հայտարարել էր, որ Ռուսաստանը երբեք չի միջամտել ԱՄՆ-ի ընտրարշավներին, նման բան չի անի նաև հիմա: Նա նշել էր, որ նախկինում ԱՄՆ-ում բազմաթիվ հետաքննություններ են եղել ամերիկյան ընտրություններին Ռուսաստանի միջամտության վերաբերյալ, որոնք ոչինչ չեն հայտնաբերել: Պեսկովը հավելել է, որ Ռուսաստանն այս անգամ էլ չի միջամտի, իսկ ԱՄՆ-ում նախագահական ընտրարշավը ամերիկացիների անձնական գործն է: