ԵՐԵՎԱՆ, 29 հուլիսի – Sputnik. Երևանի Կենտրոն վարչական շրջանում կայանված զբոսաշրջային մեքենաների վրա փակցված գովազդային պաստառների համար նոր ձևաչափ է մշակվել։ Երևանի քաղաքապետարանի գործակարգավարական խորհրդակցության ժամանակ այս մասին ասաց հասարակական կարգի պահպանության ծառայության պետ Արամ Գյուլզադյանը` անդրադառնալով ոչ սահմանված վայրերում զբոսաշրջային ավտոմեքենաների կայանումը բացառելուն ուղղված հանձնարարականին։
Մեքենաների արտաքին հատվածում առանց գովազդի տեղադրման համապատասխան թույլտվության գովազդային պաստառների տեղադրման համար կազմվել է թվով 7 արձանագրություն։ Թվով 11 գովազդային պաստառ էլ առգրավվել է։ Գովազդային պաստառների նոր ձևաչափ է մշակվել, որպեսզի համապատասխան գործունեություն իրականացնող անձինք այդ տարբերակն օգտագործեն։ Երևանի քաղաքապետ Տիգրան Ավինյանը շեշտեց` սա կարևոր գործընթաց է։
«Մի պահ քաղաքը վերածվել էր տուրիստական մեքենաների հանգրվանի։ Կարծում եմ, որ այս առումով պետք չէ զգոնությունը կորցնել, ինչքան էլ որոշակի պայմանավորվածություններ են ձեռք բերվել»,– ասաց Ավինյանը։
Նա ընդգծեց, որ նախկին փորձը հաշվի առնելով` պարբերաբար ստուգելը պարտադիր է։
Հիշեցնենք, որ վերջին շրջանում Երևանի քաղաքապետարանի աշխատակիցներն ակտիվ կերպով հեռացնում են զբոսաշրջային մեքենաների վրա փակցված գովազդային պաստառները։ Վարորդ–էքսկուրսավարները հիմնականում կանգնում են Աբովյան, Ամիրյան փողոցներում, ինչպես նաև Հյուսիսային պողոտայի տարածքում։