ԵՐԵՎԱՆ, 18 հուլիսի - Sputnik. ՀՀ կառավարությունը ԿԳՄՍՆ–ին 15 մլն 693 հազար դրամ հատկացրեց Բրիտանական թանգարանի մշտական ցուցադրության մեջ ներկայացված՝ Սատաղից գտնված և Անահիտ աստվածուհուն վերագրվող հայտնի բրոնզե արձանից պահպանված գլխի և ձեռքի ցուցադրության հանրահռչակման համար։ Որոշումն ընդունվեց ՀՀ կառավարության այսօրվա նիստի ժամանակ, որը վարում է ՀՀ փոխվարչապետ Մհեր Գրիգորյանը. ՀՀ վարչապետ Նիկոլ Փաշինյանն արձակուրդի մեջ է։
Ավելի վաղ հայտնել էինք, որ ք․ ա․ II-I դդ․ թվագրվող Անահիտ աստվածուհու արձանից պահպանված և Բրիտանական թանգարանում պահվող բրոնզե գլուխն ու ձեռքը սեպտեմբերին Հայաստան կտեղափոխվեն՝ 6 ամսով ժամանակավոր ցուցադրության համար։
ՀՀ կրթության, գիտության, մշակույթի և սպորտի նախարար Ժաննա Անդրեասյանն իր խոսքում նշեց, որ ցուցադրության համար նախատեսված մնացած լրացուցիչ ծախսերը կհոգան մասնավոր ընկերությունները։
«Մասնավոր գործընկերների ներգրավումն ունի տնտեսական հիմնավորվածություն ու շահագրգռվածություն։ Մենք չենք խոսում բարեգործության մասին, այլ խոսում ենք այդ իմաստով մշակույթի` որպես տնտեսական ճյուղի զարգացման մասին»,– նշեց նախարարը։
Նշենք, որ Բրիտանական թանգարանի հետ պայմանագիրը ստորագրվել է այս տարի։
«Մայր Աստվածություն. Անահիտից Մարիամ» խորագրով ժամանակավոր ցուցահանդեսի բացումը նախատեսված է այս տարվա սեպտեմբերի 21–ին` ՀՀ անկախության տոնին և կտևի 6 ամիս։