ԵՐԵՎԱՆ, 16 հուլիսի - Sputnik. Հայաստանյան «Էսկո-ֆարմ» ընկերությունը դադարեցրել է այն ապրանքների արտադրությունը, որոնց անվանումներում օգտագործվել են «Ինգալիպտ», «Կամետոն» և «Ֆուրացիլին» հայտնի դեղերի անվանումները: Նման որոշում է կայացվել Եվրասիական տնտեսական հանձնաժողովի նախազգուշացումից հետո, որին անբարեխիղճ մրցակցության հարցով դիմել է ռուսական «Ֆարմստանդարտ» արտադրողը:
Էլեկտրոնային առևտրի հարթակներում առկա՝ «Էսկո-ֆարմ»-ի ապրանքային քարտերում նշվում էր, որ «Ինգալիպտ Վիալայն», «Կամետոն Վիալայն», «Ֆուրացիլին Վիալայն» անվանումներով արտադրանքները, որոնք նման են հայտնի դեղամիջոցների («Ինգալիպտ», «Կամետոն», «Ֆուրացիլին») ֆիրմային անվանումներին, իբր կարող են կիրառվել շնչառական ուղիների հիվանդությունների բուժման համար։ Մինչդեռ ԵԱՏՄ համապատասխան տեխնիկական կանոնակարգը չի տարածվում ախտորոշման և բուժման համար նախատեսված ապրանքների վրա։ Բացի այդ, անվանումների այդօրինակ նմանությունը կարող է այդ ապրանքների բուժիչ հատկությունների առկայության առումով մոլորեցնել սպառողներին:
Եվրասիական հանձնաժողովը «Էսկո-ֆարմին» համապատասխան նախազգուշացում է հայտարարել։ Ըստ այդմ, ընկերությունը սահմանված ժամկետներում դադարեցրել է նշված օծանելիքային-կոսմետիկ միջոցների արտադրանքը և իրացումը:
Գնորդներին պաշտպանելու համար հանձնաժողովը նաև դիմել է էլեկտրոնային առևտրի Wildberries, Ozon և Yandex Market հարթակներին, որոնք օպերատիվ կերպով արգելափակել են ապրանքների համապատասխան քարտերը՝ մատակարարին պարտավորեցնելով հեռացնել բուժիչ հատկությունների մասին տեղեկատվությունը։
«Էսկո-ֆարմ» ՍՊԸ-ն հիմնադրվել է 1999թ: Ընկերության արտադրանքներից ամենատարածվածը «Նարին-է» կոսմետիկ և բուժական միջոցներն են: Ներկայում արտադրանքը գրանցված է ԵԱՏՄ երկրների, Վրաստանի, Ուկրաինայի, Ուզբեկստանի, Իրանի, Ինդոնեզիայի շուկաներում: