ԵՐԵՎԱՆ, 16 հուլիսի – Sputnik. Վանաձորի նախկին քաղաքապետ Մամիկոն Ասլանյանը 2,7 տարվա կալանքից հետո ազատ արձակվեց։ Նա «Վարդաշեն» ՔԿՀ-ի դիմաց լրագրողներին ասաց, որ առաջին գործը որ անելու է` շփվելու է թիմակիցների հետ՝ հասկանալու համար հետագա անելիքները։
Լրագրողի հարցին, թե արդյոք նա կրկին կմասնակցի Վանաձորի քաղաքապետի ընտրություններին և եթե` ոչ, ապա ինչու չի մասնակցի, Մամիկոն Ասլանյանը պատասխանեց.
«Ով ասաց ոչ, որ ասեմ`ինչու։ Երկու տարի յոթ ամիս հանրության հետ լայն շփումներ չեմ ունեցել, պետք է խորհրդակցենք, հասկանանք` վերջը մեր պայքարի անունն ինչ է։ Ես պաշտոնի համար կռիվ չեմ տվել, որ էսօր ասեմ` պաշտոնն ինձանից տարել են»։
Մամիկոն Ասլանյանը հայտնեց, որ երկրում տեղի ունեցող փոփոխություններին լավ տեղյակ չէ, մի փոքր հետ է մնացել։
«Ես որ գնացի բավական մեծ երկիր էր, հիմա չգիտեմ ինչ է փոխվել, գուցե մարդկությունն էլ է փոխվել»,– ասաց նա։
Ասլանյանը հայտնեց նաև, որ իր մոտեցումները չեն փոխվել, նա ոչնչից չի վախեցել ու չի խեղճացել, կամքն էլ չի կոտրվել, բայց վստահեցրեց, որ իր քայլերն այնպես կանի, որ ոչ ոք դրանից չտուժի։
Հիշեցնենք՝ 2021 թ. դեկտեմբերի 5-ին Վանաձորում ՏԻՄ ընտրություններում առավելագույն ձայներ էր ստացել «Մամիկոն Ասլանյան» դաշինքը: Դեկտեմբերի 17-ին պետք է տեղի ունենար ընտրված ավագանու անդրանիկ նիստն ու համայնքի ղեկավարի ընտրությունը, բայց դրանից մեկ օր առաջ Վանաձորի նախկին համայնքապետ, «Մամիկոն Ասլանյան» դաշինքի 1–ին համար Մամիկոն Ասլանյանը ձերբակալվեց, ապա կալանավորվեց։
Նա մեղադրվում է իր պաշտոնական լիազորությունները չարաշահելու և անցնելու, անձնական այլ դրդումներով պաշտոնեական կեղծիք կատարելու մեջ։
2022 թ. մայիսի 13–ին ՀՀ վարչապետ Նիկոլ Փաշինյանը Վանաձոր համայնքի ղեկավարի պաշտոնակատար է նշանակել Արկադի Փելեշյանին: