ԵՐԵՎԱՆ, 3 հուլիսի – Sputnik. Նոր ատոմակայանի կառուցման հետ կապված` ԱՄՆ–ի հետ մտել ենք առարկայական փուլ։ Այս մասին «ՀՀ–Արևելյան գործընկերություն–ԵՄ. մարտահրավերներ և հնարավորություններ» համաժողովի ժամանակ հայտարարեց ԱԽ քարտուղար Արմեն Գրիգորյանը։
Նրա խոսքով` հիմա ԱՄՆ–ի հետ քննարկում են իրավապայմանագրային դաշտը կարգավորելու հարցը, քանի որ առանց դրա այս հարցում առաջ գնալ չեն կարող։
«Այս պահին գնդակը ԱՄՆ–ի դաշտում է։ Մենք ակնկալում ենք, որ այս հարցն անցնի ԱՄՆ ներհամակարգային պրոցեդուրաները, որ դրանից հետո կարողանանք աշխատել»,– ընդգծեց ԱԽ քարտուղարը։
Գրիգորյանն ավելացրեց, որ ատոմակայանի հարցը երկարաժամկետ համագործակցություն է, սակայն ՀՀ կառավարությունը ԱՄՆ–ի հետ ունի նաև կարճաժամկետ ծրագրեր, քանի որ ՀՀ անվտանգության առումով ունենք դիվերսիֆիկացիա, սակայն նույնը դեռ հնարավոր չէ ասել տնտեսության մասին. այս հարցում աշխատանքները շարունակվում են։
Հիշեցնենք` Հայկական ԱԷԿ-ի գլխավոր տնօրեն Էդուարդ Մարտիրոսյանը Սոչիում լրագրողների հետ զրույցում հայտարարել էր, որ այս պահին Հայաստանին անհրաժեշտ է մինչև 1000 ՄՎտ հզորությամբ ռեակտոր։
Նրա խոսքով` Հայաստանը ԱԷԿ-ի կառուցման առաջարկների է սպասում մի քանի երկրից, և դեռ որոշված չէ` այն պետք է ստացիոնար լինի, թե մոդուլային: