ԵՐԵՎԱՆ, 1 հուլիսի – Sputnik. Ֆրանսիայում գիշերն անկարգություններ են եղել երկրում արտահերթ խորհրդարանական ընտրությունների առաջին փուլի նախնական արդյունքների հրապարակումից հետո։
Փարիզի Հանրապետության հրապարակում զանգվածային բողոքի ցույցեր են տեղի ունեցել։ «Ազգային միավորում» կուսակցության ղեկավարությունից դժգոհ ցուցարարները վանկարկել են հակաֆաշիստական կարգախոսներ։ Լիոնում ցուցարարները կոտրել են պատուհանները, իսկ ոստիկանությունը արցունքաբեր գազ է կիրառել։
Դատելով նախնական տվյալներից՝ Ֆրանսիայի նախագահ Էմանուել Մակրոնի կոալիցիան ստացել է 21,5 տոկոս՝ զբաղեցնելով երրորդ տեղը։ Առաջւին տեղում Մարին Լը Պենի «Ազգային միավորում» կուսակցությունն է (34,2%), նրան հաջորդում է ձախակողմյան «Նոր ժողովրդական ճակատ» կոալիցիան (29,1%):
Առաջին փուլի նախնական արդյունքների հրապարակումից հետո, Լը Պենն ասաց, որ «Ազգային միավորումը» գործնականում ոչնչացրել է մակրոնիստական դաշինքը։ Նա ընդգծեց, որ ընտրությունների երկրորդ փուլը վճռորոշ է լինելու և կոչ արեց թույլ չտալ ձախ դաշինքին հաղթել։
Ավելի վաղ հաղորդվում էր, որ Լը Պենի զարմուհին ստեղծելու է իր կուսակցությունը։