ԵՐԵՎԱՆ, 1 հուլիսի – Sputnik. ՀՀ կառավարությանն առընթեր պետական գույքի կառավարման վարչության պետի պաշտոնը 2011–18թթ զբաղեցրած Ա. Ս.-ն (Գալուստ Սահակյանի որդին` Արման Սահակյանը – խմբ.) պետությանը պատճառած 178 մլն ՀՀ դրամը վերականգնել է։ Տեղեկությունը հայտնում է Հակակոռուպցիոն կոմիտեն։
Քրեական վարույթով կատարված նախաքննությամբ պարզվել է, որ Ա. Ս.-ն, չարաշահելով իր պաշտոնեական լիազորությունները, շուրջ 178 միլիոն ՀՀ դրամ շուկայական արժեքով պետական անշարժ գույքն ապօրինի կերպով օտարել է իր հետ փոխկապակցված անձանց անվամբ հիմնադրված կազմակերպությանը:
«Նախաքննության ընթացքում Ա. Ս.-ին մեղադրանք է ներկայացվել ՀՀ նախկին քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ): Ներկայացված մեղադրանքում վերջինս իրեն լիովին մեղավոր է ճանաչել և ամբողջությամբ վերականգնել պետությանը պատճառված վնասը»,– ասված է հաղորդագրությունում:
Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են դատարան՝ ըստ էության քննելու համար։
Հիշեցնենք, որ Սահակյանին մեղադրանքը առաջադրվել էր դեռ 2020 թվականին, նրա նկատմամբ որպես խափանման միջոց էր կիրառվել գրավը` 5 մլն դրամի չափով։
2020 թվականի մայիսի 29-ին էր հայտնի դարձել, որ Արման Սահակյանը մի քանի այլ անձի հետ Երևանի դպրոցներից մեկին կից հողակտորի օտարման հետ կապված քրեական գործի շրջանակում ներգրավվել է որպես մեղադրյալ։ Նախաքննությունը շարունակվում է։
Արման Սահակյանը 2011-2018թթ-ին եղել է ՀՀ կառավարությանն առընթեր պետական գույքի կառավարման վարչության պետը: