Լոուքոստերների «հնարքները»․ ինչ է պետք իմանալ` գերավճար չանելու համար

Լոուքոսթերները երբեմն իսկապես զարմացնում են տոմսերի էժանությամբ։ Սակայն ամեն ինչ այնքան էլ պարզ չէ։

Առաջին հերթին բացատրենք, թե ինչ է լոուքոսթերը: Այսպիսով, սա ավիափոխադրող է, որն առաջարկում է էժան թռիչքներ՝ ավանդական ուղևորային ծառայություններից՝ սնունդ, ուղեբեռ և այլն, հրաժարվելու հաշվին:

Լոուքոսթերի անվերապահ առավելությունը (իհարկե գնի հետ միասին) այն է, որ նրանք օգտագործում են համեմատաբար նոր ինքնաթիռներ և լավ հետևում են դրանց:

Բանն այն է, որ նոր ինքնաթիռն ավելի քիչ ծախսատար է, քան հինը. այն ավելի քիչ վառելիք է սպառում և լուրջ վերանորոգում չի պահանջում, ուստի լոուքոսթերները նախընտրում են գործ ունենալ նոր սերնդի ինքնաթիռների հետ: Ճիշտ է, ավիափոխադրողները նվազեցնում են սրահի ներսում նստատեղերի միջև հեռավորությունը, որպեսզի հնարավորինս շատ ուղևոր տեղավորեն։

Ամեն ինչ սկսվում է արդեն տոմս գնելու ժամանակ։ Պատրաստ եղեք, որ ընկերության կայքում գնման գործընթացում վճարման ենթակա վերջնական գումարը զգալիորեն ավելի բարձր կլինի, քան տոմսերի արժեքը: Փաստն այն է, որ առանց ձեր իմացության դրանում կներառվեն տարբեր ծառայություններ, ինչպիսիք են առաջիկա թռիչքի հիշեցումը կամ ուղեբեռի ապահովագրությունը (նույնիսկ եթե ուղեբեռ չունեք):

Ի դեպ, որոշ լոուքոսթերներ հասնում են այն աստիճանի, որ հատուկ նստեցնում են մտերիմ մարդկանց (այսինքն նրանց, ովքեր պատրաստվում են միասին թռչել) միմյանցից հեռու։ Դե, իհարկե, միասին նստելու հաճույքի համար լրացուցիչ վճար գանձելու նպատակով։

Օդանավակայանում գրանցվելը կարող է թանկ արժենալ՝ բառի բուն իմաստով: Ընկերությունների մեծ մասում անմիջապես օդանավակայանում թռիչքի գրանցումը վճարովի է, ուստի ավելի լավ է անցնել այս ընթացակարգը առցանց՝ ավիաընկերության կայքում:

Ուշադիր եղեք ուղեբեռի հարցում: Եթե դուք չեք պատրաստվում սահմանափակվել ձեռքի ուղեբեռով, նախապես վճարեք. օդանավակայանում ստիպված կլինեք վճարել երկու կամ նույնիսկ երեք անգամ ավելին: Ի դեպ, եթե անհանգստանում եք ուղեբեռի համար, կարող եք օգտվել ապահովագրությունից։

Ինչ վերաբերում է ձեռքի ուղեբեռին, ապա այս դեպքում անհրաժեշտ է մանրակրկիտ ուսումնասիրել ընկերության կայքում դրա փոխադրման կանոնները, որպեսզի ճշգրիտ իմանաք թույլատրելի չափերն ու քաշը:

Նախապես հոգ տարեք սննդի մասին։ Ինքնաթիռում անվճար սնունդը բյուջետային ավիաընկերության պարտականություններից չէ: Եթե քաղցած եք, իհարկե, ձեզ սնունդ կբերեն, բայց զգալիորեն բարձր գնով: Նույնը վերաբերում է խմիչքներին և նույնիսկ սովորական ջրին:

Ավելի ուշադիր եղեք օդանավակայանների հարցում: Էժան ավիաընկերությունները հաճախ վայրէջք են կատարում փոքր օդանավակայաններում, որոնք գտնվում են քաղաքի կենտրոնից հեռու, կամ նույնիսկ դրա սահմաններից դուրս, քանի որ նման օդանավակայաններում հարկերը և վճարները շատ ավելի ցածր են։ Այդ իսկ պատճառով օդանավակայանից ձեզ անհրաժեշտ վայր տանող ճանապարհը կարող է լրացուցիչ ծախսեր առաջացնել։