ԵՐԵՎԱՆ, 25 հունիսի – Sputnik. Եթե Ազգային ժողովի ընդդիմադիր երկու խմբակցությունները վայր դնեն մանդատները, դրանով սահմանադրական ճգնաժամ չի ստեղծվի։ Այսօր Sputnik Արմենիա մուլտիմեդիոն կենտրոնում կայացած ասուլիսի ժամանակ այս հայտարարությունն արեց ՀՀ ԱԺ նախկին փոխնախագահ, ՀՀԿ խոսնակ Էդուարդ Շարմազանովը՝ անդրադառնալով հանրության շրջանում հաճախ հնչող հարցադրմանը, թե ինչու ընդդիմությունը վայր չի դնում մանդատները։
Նա նշեց՝ ՀՀ Սահմանադրությունը ոչ մի հնարավորություն չի ստեղծում, որ այս նման դեպքում Ազգային ժողովը լուծարվի։
Ըստ Շարմազանովի՝ երաշխիք չկա, որ մանդատները վայր դնելուց հետո ուրիշները չեն վերցնի այդ մանդատները։ Երկրորդն էլ «Քաղաքացիական պայմանագիրը» բավարար ձայներ ունի նիստեր անցկացնելու համար։
«Բացառապես ՔՊ-ի ու Նիկոլի կամքից է կախված լինելու՝ ինքը գնա ընտրությունների, թե չգնա, իսկ էդ մանդատները լրացուցիչ լծակներ են տալիս ընդդիմության գործունեությանը։ Այո՛, ոչ բավարար, բայց լրացուցիչ»,- ասաց քաղաքական գործիչը։
Նրա խոսքով՝ մի բան է միջազգային հարթակներում խոսել Հայաստանում տիրող իրավիճակից որպես արտախորհրդարանական ուժ, մեկ այլ բան է լինել խորհրդարանական ուժ։ Ի վերջո, միջազգային շատ հարթակներում անհնար է ելույթ ունենալ, եթե պառլամենտական չես։
«Մանդատներ դնելը Նիկոլի հեռացման ճանապարհը չի մոտեցնելու»,- նշեց Շարմազանովը։
Ըստ նրա՝ եթե պատկերացնենք՝ գնում ենք արտահերթ ընտրությունների, լինելու է դեժավյու` իշխանությունը կրկին բռնաճնշումներ ու ազատազրկումներ է սկսելու։