ԵՐԵՎԱՆ, 22 հունիսի – Sputnik. ՀՀ վարչապետի աշխատակազմն Ադրբեջանի նախագահի աշխատակազմին դիվանագիտական խողովակներով առաջարկել է ստեղծել հրադադարի ռեժիմի խախտման դեպքերի հետաքննության երկկողմ մեխանիզմ: Տեղեկությունը հայտնում է ՀՀ կառավարության մամուլի ծառայությունը։
Նշվում է, որ վերջին շրջանում Ադրբեջանի Հանրապետության պաշտպանության նախարարությունը պարբերաբար տեղեկատվություն է տարածում, թե ՀՀ ՊՆ ստորաբաժանումների կողմից տեղի են ունենում հրադադարի ռեժիմի խախտումներ:
Չնայած այն հանգամանքին, որ Հայաստանի Հանրապետության պաշտպանության նախարարությունը հերքել է բոլոր այդ մեղադրանքները, Ադրբեջանը շարունակում է այդօրինակ տեղեկատվության տարածումը:
Ադրբեջանի տարածած սուտ լուրերի մասին
Միայն այսօր Ադրբեջանի պաշտպանության նախարարությունը երկու անգամ ապատեղեկատվություն է տարածել` իբր ՀՀ ԶՈւ ստորաբաժանումները կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ։
Ադրբեջանը նմանատիպ հաղորդագրություններ էր տարածել նաև հունիսի 13–ին, 14–ին, 16–ին։
Ընդգծվում է, որ Ադրբեջանին նման առաջարկ անելը շարունակությունն է ՀՀ վարչապետ Նիկոլ Փաշինյանի` հունիսի 15-ին արած հայտարարության. ՀՀ կառավարության կամքն է` թույլ չտալ լարվածության առաջացում։
«Հայաստանի Հանրապետության վարչապետի աշխատակազմն առաջարկում է մեկնարկել նշված մեխանիզմի գործնականացման աշխատանքները»,–նշված է հաղորդագրության մեջ:
Հավելենք, որ ՀՀ վարչապետն ավելի վաղ հայտարարել էր, որ Ադրբեջանին առաջարկել է սպառազինության փոխադարձ վերահսկման մեխանիզմ ստեղծել և չհարձակման մասին պայմանագիր ստորագրել, եթե պարզվի, որ խաղաղության պայմանագրի ստորագումը սպասվածից ավելի երկար ժամանակ է պահանջելու։