ԵՐԵՎԱՆ, 21 հունիսի – Sputnik. Երևանը Հավաքական անվտանգության պայմանագրի կազմակերպությանը (ՀԱՊԿ) պաշտոնական փաստաթղթեր չի ուղարկել, որ կազմակերպության անդամները քննարկեն Հայաստանի հեռանալու հնարավոր հետևանքները։ Այս մասին հայտարարել է ՌԴ արտգործնախարար Սերգեյ Լավրովը Ալմաթիում ՀԱՊԿ արտգործնախարարների խորհրդի նիստից հետո կայացած ճեպազրույցում։
Նրա խոսքով` ՀԱՊԿ-ի կազմից Հայաստանի դուրս գալու ընթացակարգը չի քննարկվել միավորման անդամ երկրների արտգործնախարարների խորհրդի նիստում, քանի որ համապատասխան հարցում չի եղել:
Լավրովը նշել է, որ չեն քննարկվել նաև նման քայլի հնարավոր հետևանքները:
«Գուշակելը, թե ինչ կլիներ, եթե․․․ դիվանագիտության ավանդույթներում չկա։ Ինչպես ասացի, այո՛, այսօր ՀՀ արտգործնախարարը ներկա չի եղել նիստին, բայց որևէ փաստաթուղթ Հայաստանից, որևէ պաշտոնական քայլ, որն անհրաժեշտ կդարձներ քննարկել տեղի ունեցածի հետևանքները, չի եղել», - ավելացրել է նա։
Հիշեցնենք` ՀՀ վարչապետ Նիկոլ Փաշինյանը մարտի 12-ին չբացառեց, որ ՀՀ–ն կարող է դուրս գալ Հավաքական անվտանգության պայմանագրի կազմակերպությունից, եթե ՀԱՊԿ–ը չպատասխանի Հայաստանի բարձրացրած հարցին` ո՞րն է ՀԱՊԿ–ի պատասխանատվության գոտին Հայաստանում։ ՀԱՊԿ-ը պատասխանեց, որ Հայաստանում իր պատասխանատվության գոտին է համարում երկրի ինքնիշխան տարածքը։ Մայիսի 8-ին ՀՀ ԱԳՆ–ն հայտարարեց, որ Հայաստանը չի մասնակցի ՀԱՊԿ–ի գործունեության ֆինանսավորմանը։ Փաշինյանը հունիսի 14–ին Ազգային ժողովում հայտարարեց, որ հաջորդ տրամաբանական քայլը լինելու է ՀԱՊԿ–ից դուրս գալը: