Երևանի «Հաղթանակ» զբոսայգում պատռել են ՌԴ դրոշը և պոկել զինանշանը. տեսանյութ, լուսանկարներ

ԵՐԵՎԱՆ, 18 հունիսի – Sputnik. Երևանի «Հաղթանակ» զբոսայգու «Փառքի ծառուղում» պատռել են ՌԴ դրոշն ու պոկել զինանշանը։

Ծառուղում գտնվում է ՀՀ սահմանները պահող հայ և ռուս սահմանապահներին նվիրված արձանը, որտեղ ծածանվում էին Ռուսաստանի և Հայաստանի դրոշները, իսկ պայմանական սահմանային սյուների վրա կային երկու երկրների զինանշանները։

Sputnik Արմենիայի թղթակիցը ֆիքսել է, որ տեղադրված ռուսական պայմանական սահմանային սյան վրա երևում են պոկված ՌԴ զինանշանի հետքերը, իսկ ՌԴ դրոշից միայն մի փոքր կտոր է մնացել։ Տեղում են միայն ՀՀ դրոշն ու զինանշանը։

Sputnik Արմենիան փորձեց քաղաքապետարանից տեղեկություն ստանալ դեպքի առնչությամբ, ինչին ի պատասխան մեզ ասացին, որ «Հաղթանակ» զբոսայգին վարձակալ ունի, և «Փառքի ծառուղին» նույնպես վարձակալի տնօրինության տակ է։ Միևնույն ժամանակ նշեցին, որ կփորձեն որևէ բան ճշտել տեղի ունեցածի մասով։

«Հաղթանակ» զբոսայգու տնօրենությունը, սակայն, հերքում է, որ «Փառքի ծառուղին» իրենց է պատկանում։ Ասում են` իրենցը միայն բուն մանկական այգին է, մնացածի հետ իրենք կապ չունեն։

«Մեր տարածքը վերջանում է Մայր Հայաստանի արձանի կողքի արգելափակոցի մոտ։ Եթե քաղաքապետարանն ասում է` մերն է, թող դա մեզ էլ ասեն, մենք էլ իմանանք` ոնց զբաղվենք այդ տարածքով, ոնց բարեկարգենք, ոնց պահպանենք։ Այդ հատվածի բարեկարգումը կատարել է Քանաքեռ Զեյթուն վարչական շրջանը։ Ի՞նչ եք կարծում, որ դա մերը լիներ, իրենք կանեի՞ն»,– Sputnik Արմենիայի հետ զրույցում ասաց «Հաղթանակ» զբոսայգու տնօրեն Կարեն Գինոսյանը։

Ըստ նրա` «Փառքի ծառուղու» մոտ շատ տարօրինակ բաներ են կատարվում։ Այնտեղից բացի դրոշից ու զինանշանից, անհետացել են նաև փակցված ռուսերեն և հայերեն գրությունները։

Հավելենք, որ տարածքում որևէ տեսախցիկ չկա։