ՀՀ վարչապետ Նիկոլ Փաշինյանը խորհրդարանում ընդդիմադիր կուսակցություններին մեղադրեց Արցախի հայաթափման համար։
Նա նշեց, որ ժամանակին մեղադրում էին իրեն, որ չի թողնում արցախցիներին դուրս գալ Արցախից, ու պնդեց, որ դա արել է, որպեսզի այսօր նրանք կարգավիճակ ունենան։ Իսկ ընդդիմությունը, ըստ նրա, թքած է ունեցել ԼՂ –ի ճակատագրի վրա։
«Ձեզ իրենք պետք էին որպես ցույցի մասնակից, որովհետեւ էստեղ ցույց էիք անում, 3-4 հազարից ավել մարդ չէր հավաքվում, ձեզ ցույցի մասնակից էր պետք։ 1998 թ–ից սկսած` ԼՂ ժողովուրդը պետք է եղել ձեզ իշխանությունը պահելու համար։ Էսօր իրանց բերել եք որպես ցույցի մատերիալ, 5000 դրամով ցույցերի եք բերել, այ էս եք դուք, այ էս ա ձեր ճշմարտությունը»,– ասաց Փաշինյանը։
Նրա խոսքով` ընդդիմությունը այսօր էլ ուզում է նույնը անել ՀՀ ժողովրդի հետ։
«... Որ գուբերնիայում լինեք թեմակալ առաջնորդներ, գնաք, սարկավագներ լինեք` խորաններին խունկ ծխելով։ Ձեզ համար ԼՂ ժողովուրդը եղել է, կա ու կլինի իշխանությունը պահելու միջոց։ Դուք թքած ունենք ԼՂ–ի վրա էլ, Հայաստանի վրա էլ , հայ ժողովրդի վրա էլ։ Դուք հացկատակներ եք»,– ասաց նա։
Այս ելույթից հետո ՔՊ–ական պատգամավորները ծափահարեցին Փաշինյանին։