ԵՐԵՎԱՆ, 5 հունիսի – Sputnik. ՌԴ սահմանապահները դուրս են եկել Ներքին Հանդի մոտակայքից, ինչպես նաև այն հատվածներից, որտեղ եկել էին 44–օրյա պատերազմից հետո։ Այս մասին ՀՀ Սյունիքի մարզպետ Ռոբերտ Ղուկասյանն ասաց ՀՀ ԱԺ–ում ճեպազրույցի ժամանակ։
«Մեծ մասամբ դուրս եկած տեղեր կան, բայց ես անձամբ չեմ եղել։ Այն տեղերից են դուրս եկել, որտեղ եկել էին 44–օրյա պատերազմից հետո։ Ներքին Հանդից էլ են դուրս եկել, օրը չեմ կարող ասել, բայց արդեն բավականին ժամանակ է»,- ասաց Ղուկասյանը։
Հարցին՝ արդյոք դեռևս ՌԴ սահմանապահներ կան Սյունիքի մարզում, մարզպետը պատասխանեց՝ հստակ չի կարող ասել։ Նշեց, որ խնդիրը կայանում է նրանում, որ գուցե որոշ հատվածներից 80 տոկոսը դուրս եկած լինի, մյուսները դեռ մնան։
«Մի մասը մնում է, մինչև այլ հատվածներում դուրս գան, ինչ-որ բաներ են հանում, ի վերջո, դրանից հետո էլ մյուսներն են դուրս գալիս։ Դրա համար հստակ չեմ կարող պատասխանել»,- նշեց Ղուկասյանը։
Սյունիքի մարզպետը խոսեց նաև Տեղ գյուղի մասին, որտեղ արոտավայրերն անհասանելի են, նոր հողատարածքներ մուտք է ապահովվել, մինչև սահմանազատումն իրականացվի։
Հիշեցնենք, որ «Զվարթնոցից» ռուս սահմանապահների, ինչպես նաև Գեղարքունիքի, Սյունիքի, Տավուշի, Արարատի և Վայոց Ձորի մարզերից զինվորականների և սահմանապահների դուրսբերման մասին հայտնի դարձավ մայիսի 9-ին:
Իր հերթին ՌԴ նախագահի մամուլի քարտուղար Դմիտրի Պեսկովը հայտարարել էր, որ Հայաստանի մի շարք մարզերից Ռուսաստանի զինվորականների և սահմանապահների դուրսբերումը համաձայնեցվել Է մայիսի 8–ին Մոսկվայում երկու երկրների ղեկավարների հանդիպման ժամանակ:
Մայիսի 12-ին հայտնի դարձավ, որ ՌԴ սահմանապահները սկսել են փակել Սյունիքի իրենց հենակետերը։