ԵՐԵՎԱՆ, 4 հունիսի – Sputnik. Իրանի հետ ԵԱՏՄ ազատ առևտրի մասին համաձայնագիրն ուժի մեջ կմտնի միայն միության բոլոր երկրներում վավերացվելուց հետո: Տեղեկությունը հայտնեց ՀՀ էկոնոմիկայի նախարար Գևորգ Պապոյանը՝ խորհրդարանում ելույթ ունենալով 2023 թվականի պետբյուջեի կատարման (այդ թվում՝ Եվրասիական ինտեգրման մասով) մասին կառավարության հաշվետվության շրջանակում։
Պապոյանը նշեց, որ պայմանագիրն արդեն ստորագրվել է։
Նախարարը հավելելեց, որ մի շարք այլ երկրների հետ շարունակվում են ազատ առևտրի մասին համանման համաձայնագրերի շուրջ բանակցությունները: Առավել մեծ առաջընթաց է գրանցվել Եգիպտոսի հետ, որի հետ արդեն կայացել է բանակցությունների 6 փուլ։ Ինդոնեզիայի հետ կայացել է 4, ԱՄԷ-ի հետ՝ 2 փուլ, ընդ որում` երրորդը նախատեսվում է սկսել այս ամիս: Մոնղոլիայի հետ ԵԱՏՄ-ն դեռ միայն մեկ փուլ է անցել, կազմվել է համաձայնագրի նախնական նախագիծը։
Նշված բանակցությունների շրջանակում Հայաստանը, ինչպես և մյուս մասնակիցները, ներկայացրել է իր համար առաջնային արտահանվող ապրանքների ցանկը, որոնց շուրջ ուզում է մաքսատուրքերի նվազեցման հասնել։
Բացի այդ, ավարտական փուլում է գտնվում ծառայությունների առևտրի և ներդրումների մասին Արաբական Էմիրությունների հետ ԵԱՏՄ առանձին պայմանագրի մշակումը։
Հիշեցնենք, որ ԵԱՏՄ-Իրան ազատ առևտրի մասին նոր համաձայնագիրը պետք է փոխարինի նախորդին, որն ընդունվել էր 2019 թվականին և ենթադրում էր երկկողմ առևտրային արտոնությունների ավելի քիչ շրջանակ: