ԵՐԵՎԱՆ, 31 մայիսի — Sputnik. ՀԱՊԿ պարագծով աճող ռազմական սպառնալիքները պահանջում են hավաքական անվտանգության համակարգի մեջ մտնող ուժերի և միջոցների կատարելագործում։ Այս մասին հայտարարել է ՌԴ պաշտպանության նախարար Անդրեյ Բելոուսովը Ղազախստանում ՀԱՊԿ պաշտպանության նախարարների խորհրդի նիստի ժամանակ։
«Ռազմաքաղաքական իրավիճակի վերլուծությունը ցույց է տալիս, որ այն մնում է լարված և բնութագրվում է կազմակերպության շուրջ ռազմական սպառնալիքների աճով», - ընդգծել է Ռուսաստանի պաշտպանության նախարարության ղեկավարը։
Նրա խոսքով՝ անվտանգության արդյունավետ համակարգի ստեղծման գործում առաջնային դեր է խաղում ՀԱՊԿ շրջանակներում ռազմական համագործակցությունը: Մասնավորապես, անհրաժեշտ է միջոցներ ձեռնարկել կազմակերպության ներսում միասնության և արտաքին քաղաքական համակարգման ամրապնդման ուղղությամբ։
Բելոուսովը նաև նշել է տարածաշրջանային այլ կազմակերպությունների, առաջին հերթին ԱՊՀ-ի և ՇՀԿ-ի, ինչպես նաև բարեկամ երկրների հետ սերտ փոխգործակցության զարգացման անհրաժեշտությունը:
«Կարևոր է օգտագործել միջազգային ազդեցիկ հարթակները անվտանգության խնդիրների նկատմամբ ընդհանուր մոտեցումներն առաջ մղելու համար, պարբերաբար խորհրդակցել ինչպես բազմակողմ, այնպես էլ երկկողմ ձևաչափերում։ Պատշաճ ուշադրություն դարձնել ՀԱՊԿ գործունեության տեղեկատվական ապահովմանը՝ դրա դրական հեղինակությունը պահպանելու համար», - նշել է նախարարը։
Խոսելով կազմակերպության առջև ծառացած առանցքային խնդիրների մասին՝ Բելոուսովը հայտարարել է ՀԱՊԿ ձևաչափում օպերատիվ և մարտական պատրաստության ինտենսիվության նվազեցման անթույլատրելիության մասին:
ՌԴ ՊՆ ղեկավարը նաև ընդգծել է, որ Ռուսաստանը կուտակել է ժամանակակից պայմաններում մարտական գործողությունների վարման զգալի առաջատար փորձ և պատրաստ է կիսվել այդ փորձով՝ համատեղ միջոցառումների ընթացքում ներդնելով այն զորքերի պատրաստման պրակտիկայում:
2024-ի մայիսի 31-ին Ալմաթիում ղազախական կողմի նախագահությամբ կայացել է ՀԱՊԿ պաշտպանության նախարարների խորհրդի նիստը: Միջոցառմանը մասնակցել են կազմակերպության գլխավոր քարտուղար Իմանգալի Տասմագամբետովը և Միացյալ շտաբի պետ, գեներալ-գնդապետ Անդրեյ Սերդյուկովը: Հայաստանը հրաժարվել է մասնակցել նիստին։ Ընդ որում, հայկական կողմը հաստատել է, որ չի առարկում այս նիստում սահմանափակ ձևաչափով որոշումների ընդունմանը: