ԵՐԵՎԱՆ, 29 մայիսի – Sputnik․ Վաղն առավոտյան 10։30 «Տավուշը հանուն հայրենիքի» շարժման մասնակիցները հավաքվելու են կառավարության շենքի մոտ, քանի որ ժամը 11-ին կառավարության նիստն է։ Այսօր Սուրբ Աննա եկեղեցու մոտ օրն ամփոփելիս հայտարարեց շարժման առաջնորդ, շարժման վարչապետի թեկնածու Բագրատ արքեպիսկոպոս Գալստանյանը։
«Վաղը առավոտյան՝ ժամը 10։30 մեքենաներով բոլոր կողմերից մուտք ենք գործում Հանրապետության հրապարակ։ Եթե ոստիկանությունն արգելափակում է, մեքենան թողնում եք և ոտքով մոտենում կառավարությանը։ Եթե չեն արգելափակում, գալիս եք և կայանում կառավարության մոտ»,- հայտարարեց սրբազանը։
Նշեց՝ պետք չէ մտահոգվել, որ մեքենաները տուգանային հրապարակներ են տարվելու։ Կտարվեն, հետո դուրս կբերվեն, դա չէ կարևորը։
Ովքեր մեքենաներով չեն, Բագրատ սրբազանը հրավիրեց պարզապես ոտքով գալ կառավարության մոտ։
«Ոչ մեկ գլուխ չպահի»,- պատվիրեց շարժման առաջնորդը։
Հայտնել էինք, որ «Տավուշը հանուն հայրենիքի» շարժման անցումային կառավարության վարչապետի թեկնածուն Բագրատ սրբազանն է։ Նա խնդրել էր կաթողիկոսին սառեցնել իր 30-ամյա հոգևոր ծառայությունը։
Հիշեցնենք, որ բողոքի ցույցերը Հայաստանում սկսվեցին այն բանից հետո, երբ ապրիլի 19-ին հայտնի դարձավ, որ Երևանն ու Բաքուն պայմանավորվել են սահմանազատումը սկսել Տավուշի հատվածից։ Տավուշի մարզի Ոսկեպար ու Կիրանց գյուղերի հատվածում բողոքի ակցիաներ անելուց հետո Տավուշի թեմի առաջնորդ Բագրատ արքեպիսկոպոս Գալստանյանի գխավորած երթը Կիրանցից հասավ Երևան, մայիսի 9-ին Հանրապետության հրապարակում հրավիրված հանրահավաքի ժամանակ Բագրատ սրբազանը Նիկոլ Փաշինյանին կոչ արեց հրաժարական տալ։ ՀՀ վարչապետի արձագանքի բացակայության պայմաններում շարունակվեցին հանրահավաքները, տարբեր ոլորտների ներկայացուցիչների հետ հանդիպումներն ու անհնազանդության ակցիաները։