ԵՐԵՎԱՆ, 27 մայիսի – Sputnik․ ՀՀ ՄԻՊ ներկայացուցիչները վաղ առավոտից արագ արձագանքման այցեր են իրականացնում ոստիկանության բաժիններ` տեսակցելու այսօր բերման ենթարկվածներին։ Այս մասին հայտնում է ՀՀ ՄԻՊ մամուլի ծառայությունը։
«ՄԻՊ ներկայացուցիչները ծանոթացել են բերման ենթարկվածների իրավունքների ապահովման վիճակին»,– ասված է հաղորդագրությունում։
Նշվում է, որ ՀՀ ՄԻՊ աշխատակազմը շարունակում է աշխատել արտակարգ ռեժիմով՝ պայմանավորված տեղի ունեցող բողոքի ակցիաներով և հավաքներով:
Շարունակվում են նաև լրատվամիջոցների և սոցիալական հարթակների մշտադիտարկումները։
Հայտնել էինք, որ «Տավուշը հանուն հայրենիքի» շարժման աջակիցները վաղ առավոտից փակել են մի շարք փողոցներ ինչպես Երևանում, այնպես էլ մարզերում։ Դրան զուգահեռ կարմիրբերետավորները սկսել են բերման ենթարկել անհնազանդության ակցիայի մասնակիցներին։ Բերման ենթարկվողների թվում էր նաև ՀԱՊԿ նախկին գլխավոր քարտուղար Յուրի Խաչատուրովի որդին` Իգոր Խաչատուրովը։
Այս պահի դրությամբ` ՀՀ ոստիկանության տարբեր բաժիններ անհնազանդության ակցիաների 137 մասնակից է բերման ենթարկվել։