Մի շարք դեսպանատներ արցախցիներին վիզա չեն տալիս. Գեղամ Ստեփանյանն ահազանգում է

ԵՐԵՎԱՆ, 27 մայիսի – Sputnik․ Մի շարք դեսպանատներ մերժում են արցախցիներին մուտքի արտոնագիր տրամադրել` պատճառաբանելով, որ «070» կոդով անձնագիր կրող անձանց դիմումներին ընթացք տալ չեն կարող։ Ֆեյսբուքյան իր էջում այս մասին հայտնում է Արցախի մարդու իրավունքների նախկին պաշտպան Գեղամ Ստեփանյանը։

Ստեփանյանի խոսքով` հիմնականում խնդիրներ են առաջացնում ՀՀ–ում գործող եվրոպական երկրների դեսպանատները

Ստեփանյանը խիստ անհասկանալի և դատապարտելի է համարում այս պարզաբանումը, քանի որ դեսպանատներն անտեսում են ՀՀ իշխանությունների մեկ այլ հայտարարություն, որ «070» կոդով անձնագիրը արցախցիներին տրամադրվել է որպես ճամփորդական փաստաթուղթ։

Ավելին` Արցախի նախկին ՄԻՊ–ը հիշեցնում է` «Լեռնային Ղարաբաղից բռնի տեղահանված անձանց ժամանակավոր պաշտպանության տակ վերցնելու, ժամանակավոր պաշտպանություն ստացած փախստականի անձը հաստատող փաստաթղթի նկարագիրը և դրա տրամադրման կարգը հաստատելու մասին» ՀՀ կառավարության 2023 թ․ հոկտեմբերի 26–ի որոշմամբ «070» կոդով անձնագիրը ճանաչվել է որպես փախստականի անձը հաստատող փաստաթուղթ և սահմանվել, որ ՀՀ տարածքից դուրս այն վավեր է փախստականի վկայականի հետ միասին գործածելու պարագայում։

«Փախստականների կարգավիճակի մասին կոնվենցիայի 28–րդ հոդվածը ամրագրում է փախստականի ազատ տեղաշարժի իրավունքը՝ մասնավորապես նշելով, որ «պայմանավորվող պետություններն իրենց տարածքում օրինական կարգով բնակվող փախստականներին տալիս են ճամփորդական փաստաթղթեր՝ իրենց տարածքից դուրս ճամփորդելու նպատակով», որոնք ճանաչվում և ընդունվում են պայմանավորվող պետությունների կողմից»,– ավելացրել է Ստեփանյանը։

Նա նաև տեղեկացնում է, որ ՀՀ–ում ԱՄՆ դեսպանատունը որևէ խնդիր չի հարուցում այս հարցում։

Ստեփանյանը ՀՀ–ում հավատարմագրված դեսպանատներին կոչ է անում խնդրի վերաբերյալ վերանայել իրենց մոտեցումները, որով կերաշխավորվի «Փախստականների կարգավիճակի մասին» կոնվենցիայով սահմանված իրավունքների պատշաճ և ամբողջական հարգում ու պաշտպանում։

Հիշեցնենք` ՀՀ ՆԳՆ–ն հայտարարել էր, որ այս տարվա հունվարի 28–ից ժամանակավոր պաշտպանության կարգավիճակ ստացած ԼՂ–ից բռնի տեղահանվածները ճամփորդելիս անձնագրի հետ պետք է ունենան նաև ժամանակավոր պաշտպանության վկայականը։ Ժամանակավոր պաշտպանություն ստացած փախստականի անձը հաստատող փաստաթուղթ են անձնագիրը և ժամանակավոր պաշտպանության (փախստականի) վկայականը։ Այս երկու փաստաթղթերը ՀՀ–ից դուրս գալիս և ՀՀ մուտք գործելիս վավեր են համարվելու միայն միասին գործածելու դեպքում։