ԵՐԵՎԱՆ, 26 մայիսի – Sputnik․ Հեղեղներից տուժած համայնքներում տարհանման հատուկ կենտրոններ չեն բացվել, քանի որ դրա անհրաժեշտությունն այս պահին չկա։ Sputnik Արմենիայի հետ զրույցում այդ մասին ասացին ՀՀ տարածքային կառավարման և ենթակառուցվածքների նախարարությունից։
Ավելի վաղ հայտնել էինք, որ հորդառատ անձրևներից Լոռու և Տավուշի մարզերում, Երևանում, ինչպես նաև Դեբեդ, Աղստև, Տաշիր գետերի վարարման հետևանքով հեղեղումների առաջացրած արտակարգ իրավիճակի կառավարման նպատակով ՀՀ վարչապետ Նիկոլ Փաշինյանի որոշմամբ ձևավորվել է օպերատիվ շտաբ ՏԿԵ նախարար Գնել Սանոսյանի գլխավորությամբ:
«Սովորաբար, տարհանված մարդկանց բարեկամները գալիս, տանում են իրենց տուն։ Բոլոր այդ մարդկանց ցուցաբերվում է առաջին անհրաժեշտության օգնություն»,– նշեցին նախարարությունից։
Ընդգծվեց, որ այս պահին չկան այնպիսի տարհանված մարդիկ, որոնք գնալու տեղ չունեն։
Հայտնել էինք, որ այս գիշեր տեղացած հորդառատ անձրևների հետևանքով ՀՀ մի շարք մարզերում փակվել են ճանապարհներ, տներն ու ավտոմեքենաները հայտնվել են հեղեղի տակ, արգելափակվել են մարդիկ։
Մայիսի 26–ի գիշերը Դեբեդ գետի վարարման հետևանքով Մ-6 միջպետական ճանապարհը երկկողմանի փակ է երթևեկության համար։ Վարարման հետևանքով, նախնական տվյալներով, կա մեկ զոհ, իսկ մեկ քաղաքացի ընկել է գետը։
Հորդառատ անձրևների հետևանքով վարարել է նաև Աղստև գետը, Տավուշի որոշ հատվածներ ևս ջրով են ծածկվել։