ԵՐԵՎԱՆ, 26 մայիսի – Sputnik․ Կառավարական առանձնատան մոտ «Տավուշը հանուն հայրենիքի» շարժման առաջնորդ Բագրատ սրբազանը հայտարարեց, որ վերադառնում են Հանրապետության հրապարակ` վաղվա անհնազանդության ակցիաների մասին պայմանավորվելու։
«Մեր ասելիքները փոխանցված են, սպասելիքներ էլ չունենք։ Եթե Փաշինյանը դեռ ասելիք ունի, կգա, ձևը կգտնի մեզ հետ հանդիպելու, եթե ոչ, ապա ստիպված կլինի հանդիպել մեզ հետ»,– հայտարարեց սրբազանը։
Ավելի վաղ սրբազանը ասել էր, թե մնալու են կառավարական առանձնատան մոտ այնքան, մինչև ինչ–որ ձևով պատասխան կստանան ՀՀ վարչապետ Նիկոլ Փաշինյանից հանդիպման առաջարկի մասին։
Հանրահավաքի ժամանակ հայտնի դարձավ, որ Տավուշի թեմի առաջնորդ Բագրատ արքեպիսկոպոս Գալստանյանը խնդրել է կաթողիկոսին սառեցնել իր հոգևոր ծառայությունը, որվհետև առաջադրվել է որպես ժամանակավոր կառավարությա վարչապետի թեկնածու։
Հիշեցնենք` հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։