ԵՐԵՎԱՆ, 26 մայիսի – Sputnik․ «Տավուշը հանուն հայրենիքի» շարժման առաջնորդ Բագրատ սրբազանը չի ուզում հավատալ, որ հյուրանոցի համարում իրեն գաղտնալսել ցանկացող անձը Էլեն Աղասյանն է եղել։ Այդ մասին նա ասաց լրագրողներին` դեպի կառավարական ամառանոցներ ընթացող երթի ժամանակ։
Լրատվամիջոցները հայտնել էին, որ Բագրատ սրբազանի հյուրանոցային համարը գաղտնալսելու նպատակով փորձել են ստորին հարկի առաստաղը ծակել և լսող սարք տեղադրել։ Ավելի ուշ սրբազանի սենյակ են ժամանել ոստիկանները։ Համարից նրանց ուղեկցությամբ դուրս է եկել մի կին, որը Էլեն Աղասյանն է եղել։ Նա ժամանակին աշխատել է ՀՀ ՊՆ–ում, իսկ սոցցանցերում հայտնվել են նրա հին լուսանկարները՝ համազգեստով։ Ավելի ուշ հայտնի դարձավ, որ պաշտպանական կառույցում Էլեն Աղասյանն այլևս չի աշխատում։
«Ես դժվարանում եմ հավատալ, որ Էլենն է եղել դա, քանի որ ես շատ մտերիմ եմ եղել նրանց ընտանիքի հետ։ Անկեղծ, մարդկայնորեն դժվարանում եմ հավատալ, չեմ ուզում հավատալ։ Չեմ ասում, թե անձամբ ինչեր եմ արել իրենց համար. նա ինձ եղել է քրոջ, զավակի պես։ Ես չէի խոսի այդ մասին, եթե չհարցնեիք»,– նշեց սրբազանը։
Նա նկատեց, որ սա իշխանությունների ձախողման արդեն 2–րդ դեպքն է։ Ըստ նրա` առաջին դեպքն այն էր, երբ նա գնում էր Կիրանց, հանդիպեց ոստիկանական պատի, սակայն կարողացավ այլ ճանապարհով շրջանցել պատը ու հասնել գյուղ։ Երկրորդ դեպքը այդ գաղտնալսման փորձն էր, երբ ամեն ինչ, սրբազանի խոսքով` շատ ապաշնորհ արվեց։
«Ես ամաչում եմ, որ այդպես է մեր պետության կյանքում։ Սա նշանակում է, որ մեր երկրում համակարգերը չեն գործում»,– ընդգծեց Բագրատ սրբազանը։
Նշենք, որ այսօր կայացած հանրահավաքից հետո Բագրատ սրբազանը հավաքվածներին առաջակեց երթով գնալ դեպի կառավարական ամառանոց` հանդիպելու Նիկոլ Փաշինյանի հետ։
Հանրահավաքի ժամանակ հայտնի դարձավ, որ Տավուշի թեմի առաջնորդ Բագրատ արքեպիսկոպոս Գալստանյանը խնդրել է կաթողիկոսին սառեցնել իր հոգևոր ծառայությունը, որվհետև առաջադրվել է որպես ժամանակավոր կառավարությա վարչապետի թեկնածու։
Հիշեցնենք` հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։